Starbucks հանրահայտ սրճարանների ցանցը որոշել է իր սրճարաններում ներդնել հատուկ վճարային համակարգ iPhone և BlackBerry հեռախոսներ ունեցող հաճախորդների համար: Այս մասին հաղորդում է The Seattle Times թերթը: Այս համակարգի շնորհիվ հեռախոսի տերերը կարող են վճարումներ կատարել Starbucks-ի` ԱՄՆ-ում գտնվող ավելի քան 6800 սրճարաններում:
Հաճախորդները ընդամենը պետք է մի անգամ գնեն Starbucks քարտ և ներբեռնեն համապատասխան հավելվածը հեռախոսի մեջ: Այդ հավելվածում կարտացոլվեն տվյալ քարտի գծակոդը, որից էլ Starbucks-ի սրճարաններում կկատարվեն վճարումները: Այդ հավելվածը նաև թույլ կտա պարզել՝ մոտական տարածքում կա՞ն արդյոք Starbucks սրճարաններ, թե՞ ոչ:
Սա նաև թույլ կտա Starbucks-ի հաճախորդներին խուսափել բազմաթիվ զեղչային և այլ քարտեր միաժամանակ պահելու անհրաժեշտությունից, քանի որ բոլոր զեղչերն ու այլ հնարավորություններ ամրագրված կլինեն հեռախոսային այդ հավելվածում:
Օրինակ՝ անցած տարի Starbucks քարտերի վրա հաճախորդները ներդրել են 1,5 մլրդ դոլար, ինչը 21%-ով ավելին է եղել, քան նախորդ տարի:
Starbucks-ը համարվում է աշխարհի ամենախոշոր սրճարանային ցանցը, ներկայացված է մոտ 50 երկրներում: