Եգիպտական կառավարությունը 15 տարվա դադարից հետո որոշել է վերսկսել շրջագայությունը Նեղոսով` Կահիրեից մինչև Վերին Եգիպտոսի Ասուան քաղաք: Ուղևորությունները կվերսկսվեն այս տարվա մայիսից: Այս մասին հայտարարել է Եգիպտոսի ծրագրավորման և միջազգային համագործակցության նախարար Ֆաիզա Աբու-Նուգան:
Որոշումը կայացվել է այն նպատակով, որ զբոսաշրջիկների ներհոսքը երկրում հասցվի մինչ հեղափոխությունը եղած մակարդակին։
Դրա հետ մեկտեղ նա հայտնել է, որ զբոսաշրջության նախարարությունում քննարկում են Էլ-Մինյա, Բենի-Սուեյֆ, Սոհագ և Ասյուտ շրջաններում զբոսաշրջիկների անվտանգության ապահովման հարցը հավուր պատշաճի հոգալու համար:
Իշխանությունները մտադիր են Լյուքսոր քաղաքը հայտարարել «թանգարան բաց երկնքի տակ»: Աբու–Նուգան հայտնել է, որ բոլոր անհրաժեշտ աշխատանքներն արդեն կատարված են:
Ենթադրվում է, որ Նեղոսով շրջագայությունը Եգիպտոսին զգալի եկամուտներ կբերի:
2011 թ. հետո զբոսաշրջիկների հոսքը երկիր գրեթե երեք անգամ կրճատվել է, հիմնականում նրանց անվտանգության անբավարար ապահովման պատճառով: Դրա հետևանքով երկրի բյուջեն տարեկան 10 միլիարդ դոլար է կորցրել:
