Իլլինոյիս նահանգի Ներկայացուցիչների պալատն օրինագիծ է ընդունել, որը ծանոթության կայքերին պարտավորեցնում է ցույց տալ, թե արդյո՞ք նրանք ստուգել են իրենց հաճախորդների քրեական անցյալը: Այս մասին հաղորդում է The Decatur Herald & Review-ը:
Օրինագիծն ընդունվել է մարտի 29-ին: Ինչպես հաղորդում է The Chicago Tribune-ը, ավելի վաղ նման որոշում կայացրել էր նահանգի Սենատը:
Ստուգումը պետք է կատարվի տվյալների կառավարման բազայի միջոցով: Կայքերում պետք է նշվի, թե արդյո՞ք թույլատրվում է գրանցվել, եթե մարդն ունի քրեական անցյալ։ Բացի այդ, այնտեղ պետք է լինեն նախազգուշացումներ, մասնավորապես, այն մասին, որ օգտատերերն իրենց հասցեները չթողնեն կայքում:
Համաձայն Սենատի կողմից ընդունված օրինագծի՝ յուրաքանչյուր խախտման համար կայքին կսպառնա 50 հազար դոլարի տուգանք:
Առաջադրված միջոցառումներին ընդդիմացողները կարծում են, որ իշխանություններն այդ կերպ մարդկանց մասնավոր կյանք են ներխուժում: Բացի այդ, հայտնի չէ՝ ինչպես վարվել այն դեպքում, երբ ընկերությունը գրանցված է Իլլինոյիսի սահմաններից դուրս: