Երևանի Կենտրոն և Նորք-Մարաշ վարչական շրջանների ընդհանուր իրավասության դատարանում այսօր շարունակվել է ՀԱԿ 7 ակտիվիստներից 4-ի մասով անջատված գործի դատաքննությունը:
Դատարանում այսօր վկայություն է տվել դատարան ներկայացած միակ վկան` դեպքին ականատես քաղաքացիներից Սերգեյ Փիրումյանը, ով պնդել է իր նախաքննական ցուցմունքը, այն է՝ թե ՀԱԿ ակտիվիստները հայհոյել են ու հարվածել ոստիկաններին, իսկ վերջիններս էլ զուտ փորձել են հանգստացնել երիտասարդներին:
Դատական նիստն այսօր հետաձգվել է մինչև ապրիլի 6-ը, քանի որ գործով շուրջ 7 վկաներ այսօր դատարան չեն ներկայացել: Հաջորդ դատական նիստին չներկայանալու դեպքում դատարանը, ըստ երևույթին, որոշում կկայացնի նրանց բերման ենթարկելու մասին:
Հիշեցնենք, որ օգոստոսի 9-ին ՀԱԿ 7 ակտիվիստները բերման էին ենթարկվել Երևանի Կարապի լճի հարակից տարածքում ոստիկանության աշխատակիցների հետ ունեցած միջադեպից հետո: Նրանցից միայն Տիգրան Առաքելյանն է շարունակում մնալ կալանավորված ու մեղադրվում է խուլիգանության և իշխանության ներկայացուցչի նկատմամբ բռնություն գործադրելու մեջ: