«Հանրապետության ներսում այսօր շատ մեծ է սոցիալական և քաղաքական լարվածությունը: Մեր դիտարկումները, մեր շփումները բնակչության հետ ցույց են տալիս, որ այդ դժգոհությունը շատ ավելի մեծ է, քան երբևէ եղել է, գուցե դա ինչ-որ իմաստով կապված է ճգնաժամի հետևանքների հետ, բայց ամեն դեպքում դրա գլխավոր պատճառը, մեր կարծիքով, իշխանությունների սխալ քաղաքականությունն է և օրենքների հանդեպ անհարգալից վերաբերմունքի շարունակականությունը, որը ցուցաբերում են իշխանությունները»,- լրագրողների հետ հանդիպման ժամանակ նշեց «Ժառանգություն» կուսակցության մամլո խոսնակ Հովսեփ Խուրշուդյանը:
Ըստ նրա, իշխանությունները օրենսդրական բարեփոխումների հարցում պատրաստ չեն գնալ որևէ փոխզիջման. «Ժառանգություն» և Դաշնակցություն կուսակցությունների ներկայացրած բարեփոխումների նախագծում նշվում է, որ ընտրական հանձնաժողովները պետք է ձևավորվեն 50-50 սկզբունքով, ընդդիմադիր և իշխող կուսակցությունները պետք է հավասարապես ձևավորեն ընտրական հանձնաժողովները բոլոր մակարդակներում՝ թե՛ տեղական, թե՛ տարածքային, թե՛ կենտրոնական: Մեկ այլ կարևոր խնդիր, որ մենք առաջ ենք քաշում, պետության կողմից կուսակցությունների ֆինանսավորման խնդիրն է»: