Գերմանիայի ռազմական գործողությունների հրամանատարությունը Աֆղանստանում գերմանացի զինվորականներին Heckler & Koch G36 ինքնաձիգի պարտադիր սառեցման մասին ցուցում է տվել,- հաղորդում է Der Spiegel-ը:
Նոր ցուցումի համաձայն՝ երկարատև գնդակոծությունից հետո զինվորները պետք է թողնեն՝ զենքը սառչի այնքան ժամանակ, որ նրան հնարավոր լինի դիպչել առանց այրվելու: Այս պահանջը կատարելու դեպքում հնարավոր կլինի խուսափել հնարավոր վնասվածքներից:
Անցկացված ուսումնասիրության համաձայն՝ երկար ճակատամարտի ընթացքում, երբ G36-ից կատարվում է մոտ մի քանի հարյուր կրակոց, զենքն այնքան է տաքանում, որ 300 մ հեռավորության վրա կրակոցի ճշգրտությունն ուղիղ երեք անգամ նվազում է: Բացի այդ, զգալիորեն մեծանում է ուժեղ այրվածքների հավանականությունը:
Ըստ պարբերականի՝ G36-ի տաքանալու մասին բողոքներ անմիջապես գերմանացի զինվորականների կողմից դեռ չեն եղել, սակայն հրամանատարությունը որոշել է նախազգուշական միջոցներ ձեռնարկել:
G36 ինքնաձիգն արդեն 15 տարի շարունակ արտադրվում է Heckler & Koch ընկերության կողմից, ըստ որի՝ այն ի սկզբանե նախատեսված չի եղել երկարատև կրակահերթեր արձակելու համար:
Ներկայումս G36 թողարկվում է մի քանի տարբերակով՝ V, KV, K և C:
