Իրանական IRNA լրատվական գործակալությանը տված հարցազրույցի ժամանակ Իրանի արտգործնախարար Ալի Աքբար Սալեհին հայտարարել է, որ Իրանը չի զիջի թշնամիներին և չի հրաժարվի իր նվաճումներից՝ մեկնաբանելով Իրանի միջուկային ծրագրի շուրջ ստեղծված իրավիճակը.
«33 տարվա ընթացքում (1979 թվականի իսլամական հեղափոխությունից ի վեր) Արևմուտքը ճնշումներ է բանեցնում Իրանի վրա՝ հայտարարելով տարբեր տիպի պատժամիջոցների սահմանման մասին, որ առնչվում են նաև մեր ֆինանսական հիմնարկներին:
Հնարավոր է, որ այդ պատժամիջոցները մեզ համար ստեղծել են աննշան խնդիրներ, սակայն մենք շարունակում ենք ընթանալ մեր ընտրած ուղիով: Իրանը չի ենթարկվի թշնամիներից և ոչ մեկին՝ անկախ թշնամու հզորությունից: Իրանի իշխանությունների և ուժային կառույցների, այդ թվում՝ նաև գերագույն ղեկավար և հոգևոր առաջնորդ, այաթոլլահ Ալի Խամենեիի, նախագահ Մահմուդ Ահմադինեժադի, բանակի, իսլամական հեղափոխության պահակազորի, «Բասիջ» աշխարհազորի և ողջ ազգի ջանքերն ուղղված են իսլամական հանրապետության պաշտպանությանը»:
Հիշեցնենք, որ Իրանի և «Վեցյակի» միջև առաջիկա բանակցությունները տեղի են ունենալու ապրիլի 13-14-ը Ստամբուլում:
