Թռչունների պաշտպանության մասին Միջազգային կոնվենցիան ընդունվել է 1906 թվականի ապրիլի 1-ին։ Ըստ մասնագետների հաշվառման՝ 1600 թվականից հետո երկրագնդի վրա անհետացել է թռչունների մոտ 100 տեսակ։ Այժմ էլ շատ տեսակներ կանգնած են անհետացման վտանգի առաջ։
ՀՀ-ում, ըստ բնապահպանության նախարարության հրատարակած Կարմիր գրքի տվյալների, այժմ կա 96 տեսակի թռչուն, որոնք պահպանության խնդիր ունեն։ Բնապահպան Սիլվա Ադամյանը «Առաջին լրատվական»-ի հետ զրույցում նշեց, որ չնայած Կարմիր գրքում նշված է 96-ի մասին, բայց հատուկ հոգածության կարիք ունի 110 տեսակ:
«Խոսրովի անտառ» պետական արգելոցի տնօրեն Վորոնցով Բարսեղյանի փոխանցմամբ՝ արգելոցում այժմ կա շուրջ 149 տեսակի թռչուն։ Դրանք գտնվում են արգելոցի և պետության հոգածության ներքո։ Այն հարցին, թե արգելոցում որսագողության դեպքեր գրանցվե՞լ են, տնօրենը պատասխանեց. «Էլ ինչի՞ համար ենք աշխատում, որ պետք է թույլ տանք արգելոցի թռչուններին որսան»։
ՀՀ-ում արդեն 10 տարի է, ինչ Թռչունների պահպանության կենտրոնն անցկացնում է ջրլող թռչունների ձմեռային հաշվառում։ Այս տարի ընդհանուր առմամբ գրանցվել է 42 տեսակի 41.360 թռչուն, որը վերջին տարիներին արված հաշվառումների ամենաբարձր ցուցանիշն է: Հաշվառումները կատարվել են Սևանա լճի ավազանում, Արմաշի ձկնաբուծական լճերում և Մեծամոր գետում: Հաշվառման արդյունքում չի գրանցվել կարմիր բադ, չնայած անցած տարիներին Սևանա լճի ավազանում գրանցվել է այս տեսակը։ Փոխարենը լճում գրանցվել են հետաքրքիր տեսակներ՝ ճչան և փոքր կարապներ, լուտոկ և խայտաբադ:
Անհետացող թռչունների թվում, ըստ Սիլվա Ադամյանի, քաղաքային միջավայրում ապրող երգեցիկ թռչուններն են։ Նա ասաց, որ Երևանում շատացել են ագռավներն ու կաչաղակները, որոնք սնվում են երգեցիկ թռչունների ձվերով, առնետներով և աղբով. «Մենք պետք է քայլեր ձեռնարկենք՝ պաշտպանելու համար քաղաքի զարդ հանդիսացող այս թռչուններին։ Իսկ դրա համար անհրաժեշտ է մաքուր պահել քաղաքը»։
