Այսօր լրագրողների հետ հանդիպման ժամանակ «Ժառանգություն» կուսակցության մամլո խոսնակ Հովսեփ Խուրշուդյանը, խոսելով ընտրական բարեփոխումների մասին, ասաց, որ իրենց համար ակնհայտ է, որ իշխանությունների կողմից տարվող գործընթացը չի պարունակում ընտրական օրենսգրքի իրական բարեփոխումների համար անհրաժեշտ կարևորագույն այն նախադրյալը, որը իրենք անվանում են քաղաքական կամք. «Այսօրվա լուսաբանման մակարդակը իշխանությունների, լրատվամիջոցների կողմից ևս դա է հուշում, որ բարեփոխումների խնդիրը իրենց համար ակտուալ չէ և արվում է ընդամենը միջազգային կառույցներին, ինչ-որ իմաստով գուցե նաև մեր հասարակությանը հանգստացնելու նպատակով և ցույց տալու համար, թե իբր տեղի են ունենում ընտրական բարեփոխումներ: Սակայն իրականում խնդիրը շատ լուրջ է, և իշխանությունները պետք է ընտրեն՝ արդյոք իրենք ուզո՞ւմ են, որ հաջորդ ընտրությունները տեղի ունենան առճակատման սցենարով, բախումնային սցենարով, թե՞ ուզում են, որ լինեն նորմալ, ազատ, թափանցիկ ընտրություններ` հիմնված բոլորի կողմից ընդունելի կոնսենսուսային ընտրական օրենսգրքի վրա»: