1878թ. այս օրը Վրաստանի Շուլավեր գյուղում ծնվեց հայ արձակագիր և թարգմանիչ, ԽՍՀՄ գրողների միության անդամ (1934-ից) Մովսես Արազին (Մովսես Մելիքի Հարությունյան, ծածկանունը` Ֆերնանդո:)
«Իսրայել Օրի» վեպի, «Արևը» պատմվածքի հեղինակը նախնական կրթությունն ստացել է Շուլավերում, ապա՝ Թիֆլիսի ռեալական դպրոցում, որն ավարտել է 1898թ.: 1899-ին ընդունվել է Պետերբուրգի տեխնոլոգիական ինստիտուտը: Երկու անգամ` 1901 և 1905թթ. ձերբակալվել է ուսանողական հեղափոխական ցույցերին մասնակցելու համար և 1905թ. բանտից դուրս գալուց հետո վերադարձել է Թիֆլիս:
Գրական ասպարեզ է իջել 1906թ.: Գրել է մի շարք փոքրիկ պատմվածքներ: 1906-ին «Մուրճ» ամսագրում տպագրվում է նրա առաջին պատմվածքը` «Դոն Կարապետի արշավանքը դեպի Կղերստան»: 1914թ. Հակոբ Հակոբյանի հետ հրատարակել է «Կարմիր մեխակներ» և «Բանվորի ալբոմ» ժողովածուները։
Պարգևատևվել է Լենինի, Աշխատանքային կարմիր դրոշի շքանշաններով։
Մահացել է 1964թ. դեկտեմբեր 21-ին: