Anomymous հաքերային խմբավորումը փետրվարին հայտարարություն էր տարածել, որով սպառնում էր մարտի 31-ին անջատել համացանցը: Օրը մոտենում է ավարտին, և սպառնալիքն առայժմ չի իրականացել:
«Առաջին լրատվական»-ի հետ զրույցում տեղեկատվական անվտանգության փորձագետ Սամվել Մարտիրոսյանը նշեց, որ տեսականորեն իրական է, որ համացանցը վերանա, բայց շատ բարդ խնդիր է և երկար չի տևի: Anomymous-ը մտադիր էր միաժամանակյա հարձակում գործել համացանցի աշխատանքն ապահովող 13 գլխավոր սերվերների կամ DNS սերվերների վրա: Դրանցից 10-ը գտնվում են ԱՄՆ-ում, մեկական՝ Մեծ Բրիտանիայում, Շվեդիայում և Ճապոնիայում:
«Տեսականորեն, եթե դրանք անջատվեն, ցանցը կանջատվի»,- ասաց Ս. Մարտիրոսյանը՝ նշելով, որ հաքերային խմբավորումը հատուկ ծրագրի միջոցով մեծ քանակի համակարգիչներից հարձակումներ է գործում կայքերի վրա, ինչի շնորհիվ ժամանակ առ ժամանակ կարողանում են անջատել ինչ-որ կայքեր, օրինակ՝ վերջերս անջատել էին Վատիկանի, թուրքական կառավարության կայքերը և այլն:
Սակայն խնդիրն այն է, որ այս 13 սերվերները շատ ավելի պաշտպանված են և ունեն հայելի սերվերներ, այսինքն՝ փաստացի, դրանց թիվը ոչ թե 13 է, այլ 200: Որքանով կկարողանան հաքերներն այդքան մեծ քանակի լուրջ սերվերներ կոտրել, լուրջ հարց է: Ս. Մարտիրոսյանի խոսքով՝ պատմության մեջ մի դեպք է եղել, երբ անհայտ հաքերները 2005-2006թթ. կարողացան 13 սերվերներից 7-ն անջատել, բայց մնացած 6-ը շարունակեցին ապահովել համացանցի աշխատանքը: «Այն ժամանակ ցանցն այդքան ակտիվ չէր, բայց նաև այդքան պաշտպանված չէր, որքան հիմա»,- նշեց մասնագետը:
Հարցին՝ ի՞նչ կլինի, եթե մի օր համացանցը վերանա, Ս. Մարտիրոսյանը պատասխանեց. «Այսօր այնքան բան է կախված ցանցից, և կան երկրներ, որոնց կախվածությունը ցանցից շատ մեծ է: 2007-ին ռուսական հաքերները Էստոնիայի ցանցը կախեցին, և երկիրը լուրջ ճգնաժամի առաջ կանգնեց, քանի որ էլեկտրոնային կառավարումը շատ զարգացած է այնտեղ, և բոլոր պետական կառույցների հետ կապված գործողությունները կագնեցին: Գործնականում ինտերնետի պաշտպանվածությունը մեծ է և շարունակաբար ավելացվում է»:
