Ապամոնտաժումն ուժի մեջ է: Մի որոշ ժամանակ քննարկումներից հետո 10 հասարակական գործիչները որոշեցին, որ իրենց նախնական որոշումն ուժի մեջ է մնում: Ինչպես տեղեկացրեց ՌԱՀՀԿ փորձագետ Սարո Սարոյանը, իրենք ոչ մի սադրանքի, բռնի գործողությունների չեն դիմում, սակայն առաջին իսկ հնարավորության դեպքում, եթե ոստիկանները թերանան իրենց պաշտպանության հարցում, իրենք դա կօգտագործեն և կսկսեն կրպակների ապամոնտաժումը: «Թող 3 տարի կանգնեն, մենք պատրաստ ենք հարկ եղած դեպքում այդքան կանգնելու»,- ասաց Սարո Սարոյանը:
Լրագրողների հետ խոսեց Երևանի փոխոստիկանապետ Ներսիկ Նազարյանը: Նա ասաց, որ ոստիկանները իրենց ծառայությունն են կատարում, և լրագրողների այն դիտարկմանը, թե ոստիկանները կմնա՞ն պուրակում, եթե ակտիվիստները շարունակեն մնալ, պատասխանեց, որ դա իրենց աշխատանքն է, և իրենք դա կանեն: «Ոստիկանները բոլորի ոստիկաններն են և պետք է շարունակեն պուրակում հասարակական կարգ պահպանել և նաև պետք է պաշտպանեն ակտիվիստներին. ոստիկանությունը բոլորին է պաշտպանում»,- եզրափակեց Ներսիկ Նազարյանը:
Այս պահին Մաշտոցի պուրակը շարունակում է մնալ բազմամարդ: Պուրակի պաշտպան երիտասարդ և ավագ սերունդը շարունակելու է կրպակներն ապամոնտաժելու համար հարմար առիթ գտնել:
