ԱՄՆ-ը Ռուսաստանի կողմից լուրջ վտանգ չի տեսնում, և Ռուսաստանը չպետք է նման վտանգ տեսնի ԱՄՆ-ի կամ ՆԱՏՕ-ի կողմից: Նման հայտարարություն է արել ԱՄՆ սպառազինության և միջազգային անվտանգությանհարցերով պետքարտուղարի տեղակալի ժամանակավոր պաշտոնակատար Ռոուզ Գյոթեմյուլլերը՝ ռուս ուսանողների հետ հանդիպմանը:
Ինչպես հաղորդում է RIA Novosti-ն, դիվանագետը նշել է, որ Ռուսաստանի և ԱՄՆ-ի միջև հարաբերությունների բարելավմանը կարող են նպաստել փորձագետների աշխատանքները, որոնք պետք է քննարկեն հարաբերությունների մակարդակը բարձրացնելու տեխնիկական մանրամասները:
«Ժամանակն է, որ փորձագետները խոսեն տեխնիկական մանրամասների մասին, իսկ Ռուսաստանի և ԱՄՆ ղեկավարությունները պետք է նրանց օգնեն»,- ասել է նա՝ ավելացնելով, որ այժմ երկու երկրների միջև «տնային աշխատանքի» շատ կարևոր ժամանակաշրջան է: Նրա խոսքերով՝ կողմերը վերջին տարիներին շատ բանի են հասել, և այժմ եկել է ապագայի մասին մտածելու ժամանակը:
Հիշեցնենք, որ երկուշաբթի CNN հեռուստաալիքին տված հարցազրույցում ԱՄՆ նախագահի հանրապետական թեկնածու Միթ Ռոմնին հայտարարել էր, որ ԱՄՆ համար մեկ աշխարհաքաղաքական թշնամին ոչ Իրանն է և ոչ էլ Հյուսիսային Կորեան, այլ Ռուսաստանը:
