Նոր համակարգը երազում է

Ըստ ՀՀ բնապահպանության նախարարության մոնիտորինգային նոր համակարգի ցուցանիշների` վերջին 2 տարվա ընթացքում Երևանի օդային ավազանը մաքրվել է, իսկ աղտոտվածությունը 1.5 անգամ պակասել է: Սակայն նախարարության այս ցուցանշներին բոլորովին չեն վստահում ՀՀ բնապահպանական կազմակերպությունները: «Դա բացառվում է, քանի որ ոչ մի դրական գործընթաց տեղի չի ունեցել, որն այդպիսի արդյունքի կբերեր»,- «Առաջին լրատվականի» հետ զրույցում նշեց բնապահպան Վիգեն Սարգսյանը: Խնդիրն այն է, որ Բնապահպանության նախարարության մոնիտորինգային կենտրոնը նոր համակարգ է տեղադրել ու փոխել իր մեթոդիկան և փոխելու հետ միանգամից բոլոր ցուցանիշները լավացել են: Այս արդյունքները չնայած որևէ վստահություն չեն առաջացնում, այնուհանդերձ մենք չունենք էլ անկախ լաբորատորիա, որը հնարավորություն կտար իրական ցուցանիշները տեսնել: «Հիմա էլ սկսել են հայտարարել, թե մեր հին ցուցանիշներն են սխալ եղել: Այն ժամանակ Մոսկվայից էին գալիս, ամբողջական ստուգում էին անցկացնում և Մոսկվան երբեք շահագրգռված չի եղել, որ Հայաստանում վատ ցուցանիշներ լինեն»,- մեզ հետ զրույցում նշեց էկոլոգ Արմեն Պետրոսյանը: Բնապահպանը խնդրում է նկատի առնել նաև այն, որ եթե նախկինում նմուշները վերցնում էին օրվա ընթացքում մի քանի անգամ, իսկ գիշերն ավելի քիչ, ապա այսօր ավտոմատ ամբողջ օրն են վերցնում, մինչդեռ գիշերն օդը մաքրվում է և միջինը ստացվում է մաքուր: Իսկ «Հանուն կայուն զարգացման ասոցիացիայի» նախագահ Կարինե Դանիելյանը ապշեցուցիչ է համարում հատկապես այն հանգամանքը, որ ըստ մոնիտորինգի նոր համակարգի տվյալների` Կոմիտասի պես բանուկ փողոցի վրա ածխաթթու գազը նորմայի սահմաններում է. «Նշանակում է, որ քաղաքները որևէ էկոլոգիական գործունեություն առհասարակ չպետք է կատարեն, ինչքան ուզում ես տրանսպորտ բաց թող, ածխաթթու գազը նորմայի մեջ է, իսկ դա բացառվում է»,-նշում է բնապահպանը: