Իրանական Fars News լրատվական գործակալության փոխանցմամբ՝ Իրանի գերագույն ղեկավար և հոգևոր առաջնորդ, այաթոլլահ Ալի Խամենեին երեկ հանդիպել է Թուրքիայի վարչապետ Ռեջեփ Էրդողանի հետ: Հանդիպման քննարկման գլխավոր առարկան հանդիսացել է Սիրիայի հարցը:
Հանդիպման ժամանակ Խամենեին հայտարարել է, որ իրենք աջակցում են Սիրիայում իրականացվող բարեփոխումներին. «Մենք կարծում ենք, որ պետք է շարունակվեն Սիրիայում անցկացվող բարեփոխումները: Իրանը դեմ է հանդես գալու Սիրիայի վերաբերյալ ԱՄՆ-ի կողմից կազմակերպված ամեն նախագծի: Սիրիան Իրանի հետ համերաշխ է Իսրայելի հարցում, և Իրանն աջակցում է Սիրիային: Մենք դեմ ենք Սիրիայի ներքին գործերին արտաքին միջամտությանը:
Իրանը մտադիր է զարգացնել Թուրքիայի հետ իր հարաբերությունները: Երկկողմանի հարաբերությունների զարգացումը կլինի թե՛ Իրանի, թե՛ Թուրքիայի և ողջ իսլամական աշխարհի օգտին: Ներկայիս պայմաններում կարևոր է, որ անկախ պետություններն ընդունեն ճիշտ որոշումներ և առաջին հերթին հաշվի առնեն սեփական շահերը»:
Էրդողանն իր հերթին հայտարարել է, որ գոհ է իր իրանական այցից. «Մենք շահագրգռված ենք երկու երկրների միջև համագործակցության ընդլայնմամբ: Տարածաշրջանում շատ ծանր գործընթացներ են ընթանում: Մենք հուսով ենք, որ այդ գործընթացները կավարտվեն անցավ»:
