«Մարտի 27-ն ամբողջ աշխարհում նշվում է որպես Թատրոնի միջազգային օր: Քանի որ Հայաստանը ևս միջազգային հանրության մի մասն է, Հայաստանում նույնպես նշվել է այդ տոնը: Այն հատկապես մեծ շուքով է նշվել Արտաշատ քաղաքում, որը, ինչպես հայտնի է, ոչ միայն Հայաստանի հնագույն մայրաքաղաքներից է, այլ նաև հայկական թատրոնի մայրաքաղաքը»,- գրում է «Հրապարակ»-ը և հավելում.
«Մարտի 27-ին Արտաշատ քաղաքում տոնվող միջոցառման հյուրերի ցանկում է եղել ՀՀԿ շտաբի պետ Հովիկ Աբրահամյանը: Վերջինս, կուլիսներում զրուցելով Արարատի մարզպետ Էդիկ Բարսեղյանի և մարզպետարանի վարչության պետերի հետ, բավական կտրուկ արտահայտություններ է արել Արարատի նախկին մարզպետ, ՀՀ նախկին ոստիկանապետ և նախագահ Սերժ Սարգսյանի խորհրդականի պաշտոնը զբաղեցնող Ալիկ Սարգսյանի մասին:
Աբրահամյանը մարզպետին ասել է, որ եթե մարզում ինչ-որ միջոցառում է կազմակերպվում, ապա պետք է ընտրություն կատարեն հրավիրյալների մեջ. հրավիրեն կա՛մ իրեն, կա՛մ Ալիկ Սարգսյանին, քանի որ ինքը ոչ մի ցանկություն չունի Ալիկ Սարգսյանի հետ միևնույն տարածքում գտնվելու:
Ի դեպ, այդ օրը Ալիկ Սարգսյանը հրավիրյալների մեջ չի եղել: Ըստ մեր տեղեկությունների, ոստիկանապետի նկատմամբ նման թշնամական վերաբերմունքի պատճառն այն է, որ Աբրահամյանը համարում է, որ ոստիկանապետի պաշտոնը զբաղեցնելու շրջանում Սարգսյանն աշխատել է իր դեմ, և ինքը որոշել է դա անհետևանք չթողնել»: