Լիբանանում Սիրիայից փախստականների թիվը գերազանցել է 20 հազարը։ Այս մասին հինգշաբթի օրը հաղորդել է Վատիկանի ռադիոն՝ հղում անելով Բեյրությում Caritas կաթոլիկ բարեգործական կազմակերպության ղեկավար, քահանա Սիմոն Ֆադդաուլին:
Caritas-ի տվյալներով՝ փախստականների ընդհանուր թիվն ավելի քան երկու անգամ գերազանցում է ՄԱԿ-ի տվյալները, որոնց համաձայն՝ Լիբանանում պաշտոնապես գրանցված է 9 հազար փախստական:
Քահանան հայտարարել է, որ շատ փախստականներ տարբեր պատճառներով չեն ուզում, որ իրենց լուսանկարեն և գրանցեն: Պատճառներից մեկը` Սիրիայում իրենց հարազատների հնարավոր հետապնդումներն են այն պարագայում, եթե իմանան, որ իրենք լքել են երկիրը:
Ֆադդաուլիի խոսքերով՝ հոգեպես և ֆիզիկապես քայքայված փախստականների մեջ կան և՛ քրիստոնյաներ, և՛ մուսուլմաններ:
Պաշտոնական տվյալներով՝ անցած տարվա մարտի կեսերին հարևան Հորդանան էին անցել մոտ 80 հազար սիրիացիներ, որոնց մեծ մասն ապրում է հարազատների մոտ, այդ իսկ պատճառով գրանցված չի որպես փախստական:
