Մալիի «Ազգային շարժում Ազավադի համար» և «Անսար Ադ-Դին» անջատողական խմբավորումների ապստամբ տուարեգները հինգշաբթի օրը հարձակվել են երկրի հյուսիսում գտնվող Քիդալ քաղաքի վրա:
Ինչպես հայտնել են Մալիի ռազմական կառույցներից, ներկայումս զինվորականները պաշպանում են ռազմավարական այդ կարևոր բնակավայրը: ИТАР-ТАСС-ի փոխանցմամբ՝ անցյալ շաբաթվանից Քիդալը շրջապատված է ապստամբների ուժերով, որոնք ցանկանում են ինքնավարություն հաստատել Մալիի հյուսիսային շրջաններում:
Նշված երկու խմբավորումները տարբեր գաղափարախոսություններ ունեն, սակայն նրանք միավորել են իրենց ուժերը` կենտրոնական իշխանությունների դեմ պայքարելու համար:
Նշենք, որ տուարեգները Սահարայի քոչվոր ցեղերից են: 1990-2000 թվականներին նրանք բազմիցս զինված պայքար են մղել աֆրիկյան մի շարք պետությունների, մասնավորապես՝ Մալիի և Նիգերիայի դեմ, սակայն բանակցությունների արդյունքում կոնֆլիկտները հարթվել են:
Մալիի իշխանությունների և ապստամբ տուարեգների հարաբերությունները կրկին անգամ լարվեցին այս տարվա հունվարին, երբ «Ազգային շարժում Ազավադի համար» խմբավորման անդամները հարձակվեցին Մալիի հյուսիսային քաղաքների վրա:
