Բելառուսական Օրշա քաղաքում այսօր սկսվել է ընդդիմության ղեկավարների դատավարությունը: Ինչպես հաղորդում է ИТАР-ТАСС-ը, մեղադրյալների աթոռին հայտնվել են «Միացյալ քաղաքացիական կուսակցության» նախագահ Անատոլի Լեբեդենկոն, «Ազատ աշխարհ» կուսակցության առաջնորդ Սերգեյ Կալյակինը և «Եվրոպական Բելառուս» քաղաքացիական շարժման ակտիվիստներից Ալեքսանդր Օտրոշենկովը:
Նրանց ներկայացվող մեղադրանքների էությունը դեռ հայտնի չէ: Ինչպես հաղորդում են ՄՔԿ–ի մամլո ծառայությունից, դատավարության ամենասկզբում ամբաստանյալները միջնորդություն են ներկայացրել՝ գործի նյութերին ծանոթանալու համար: Դատարանը միջնորդությունը բավարարել է: Դատավարության ընթացքին դադար է տրվել:
Մարտի 27-ի լույս 28-ի գիշերը բելառուսական ընդդիմության առաջնորդների այս խումբը գնացքով Մինսկից Մոսկվա էր ուղևորվել, որպեսզի ռուսական մայրաքաղաքից թռչի Բրյուսել ու մասնակցի Եվրոպական հանձնաժողովի հանդիպումներին:
Ընդդիմադիրներն ընտրել էին այս երթուղին, քանի որ մոտ մեկ ամիս առաջ բելառուսական իշխանությունները կազմել էին արտասահման մեկնելու թույլտվություն չունեցող քաղաքացիների հատուկ ցուցակ, որում ներառվել էին ընդդիմադիր քաղաքական գործիչները, իրավապահները և լրագրողները, ովքեր ԵՄ-ին կոչ էին արել Բելառուսի հանդեպ պատժամիջոցները խստացնել։
Ընդդիմադիրներին տարբեր պատճառաբանությամբ կանգնեցրել էին Լիտվայի և Լեհաստանի հետ սահմաններին, և նրանք ստիպված էին եղել տուն վերադառնալ: Միաժամանակ ռուս-բելառուսական սահմանին սահմանապահային հսկողություն չկա, այդ իսկ պատճառով դեռ մի քանի օր առաջ ընդդիմադիրներից ոմանց հաջողվել էր արտասահման մեկնել Մոսկվայով:
Բայց այս անգամ ուղևորությունն ընդհատվել է մինչև ռուս–բելառուսական սահմանին հասնելը` Օրշա կայարանում, որտեղ ընդդիմադիր առաջնորդները ձերբակալվել են և դուրս են բերվել գնացքից: Լեբեդենկոն հեռախոսով հասցրել է հաղորդել, որ սկզբում խոսք է եղել այն մասին, թե իբր ընդդիմադիրները թմրանյութ են տեղափոխում, սակայն հետո արձանագրություն է կազմվել մանր խուլիգանության մասին: Դատը սկսվելուց առաջ ավելի քան մեկ օր ընդդիմության առաջնորդները կալանքի տակ են եղել:
