Ամերիկացի դեմոկրատ կոնգրեսական Գրեգորի Միքսը հերքել է Մասաչուսեթսի նախկին նահանգապետ Միթ Ռոմնիի այն խոսքերը, որ Ռուսաստանն ԱՄՆ-ի համար մեկ աշխարհաքաղաքական թշնամին է: Կոնգրեսականի հոդվածը հրապարակել է Politico-ն:
Միքսը, որը նաև Ներկայացուցիչների պալատի՝ միջազգային հարցերով կոմիտեի անդամ է, ընդգծել է, որ «սառը պատերազմն» ավարտվել է: Նրա խոսքերով՝ ԱՄՆ-ը և Ռուսաստանը հաջողությամբ համագործակցում են կարևոր ոլորտներում, պայքարում են միջազգային ահաբեկչության, զանգվածային ոչնչացման զենքի տարածման և մարդկանց առևտրի դեմ: Կոնգրեսականը նաև հիշեցրել է, որ Ռուսաստանը թույլատրել է իր տարածքով Աֆղանստան բեռների տեղափոխումը:
«Մենք վախ չենք զգում ռուսների նկատմամբ,- գրել է կոնգրեսականը,- Մենք գնալով ավելի շատ ենք աշխատում նրանց հետ՝ իրական սպառնալիքներից պաշտպանվելու համար»: Միքսն, այնուամենայնիվ, նշել է, որ մի շարք հարցերում ԱՄՆ-ի և Ռուսաստանի միջև իրոք տարաձայնություններ կան:
Նման հայտարարությամբ ավելի վաղ հանդես էր եկել Սպիտակ տան մամուլի քարտուղարի տեղակալ Ջոշ Էռնեստը: Նա նշել էր, որ սառը պատերազմը 20 տարի առաջ ավարտվել է:
Հիշեցնենք, որ Մասաչուսեթսի նախկին նահանգապետ Միթ Ռոմնին Ռուսաստանն անվանել էր ԱՄՆ-ի համար մեկ աշխարհաքաղաքական թշնամին այն բանից հետո, երբ Սեուլում ԱՄՆ և ՌԴ նախագահների հանդիպման ժամանակ Օբաման Մեդվեդևին ասել էր, որ ընտրություններից հետո ինքն ավելի ճկուն կլինի և իրենց կհաջողվի համաձայնության գալ ՀՀՊ հարցում:
