Դատավոր Մնացական Մարտիրոսյանի նախագահությամբ Երևանի Կենտրոն և Նորք-Մարաշ վարչական շրջանների ընդհանուր իրավասության դատարանում այսօր շարունակվեց պետական դավաճանության մեջ մեղադրվող Կարեն Մեհրաբյանի և նրան օժանդակելու մեջ մեղադրվող թվով 5 անձանց` Ռոմիկ Մաթևոսյանի, Աշոտ Չտրկյանի, Կարեն Պետրոսյանի, Արթուր Ավետիքյանի և Դավիթ Ավետիքյանի գործով դատաական նիստը:
Այս գործով դեռ 2011 թվականի դեկտեմբերի 5-ից է սկսել դատավարությունը, իսկ այսօր արդեն գործը հասել էր դատական վիճաբանությունների փուլին: Դատարանում այսօր պաշտպանական ճառով հանդես եկավ Ռոմիկ Մաթևոսյանի պաշտպան Սարգիս Ասլանյանը, որի պաշտպանյալը մինչ օրս պնդում է, թե անմեղ է և ոչ մի առնչություն չունի այս ամենի հետ:
28-ամյա երիտասարդին, ի դեպ, մեղադրանք է առաջադրվել այն բանի համար, որ նա 2007 թ. մեկնելով Թուրքիա՝ այնտեղ ծանոթացել է այդ երկրում գործունեություն ծավալած Ադրբեջանի հետախուզական ծառայություններին առնչություն ունեցող Սայիդ անունով անձնավորության և որպես վերջինիս ազգական ներկայացած՝ Ադրբեջանի հետախուզական ծառայությունների աշխատակից հանդիսացող Տիգրան անունով անձնավորության հետ, հավաքագրվել վերջինիս կողմից և ստացել առաջադրանքներ` Թուրքիա աշխատելու նպատակով ծամանած ՀՀ քաղաքացիների միջից գտնել հավաքագրման համար հավանական անձանց: Վերադառնալով Հայաստան` փորձել է տեղեկություններ հայթայթել իրավասու` զինծառայողներ հանդիսացող անձանցից, այսինքն` մեղադրվում է լրտեսության ձևով պետական դավաճանության մեջ:
Ռոմիկ Մաթևոսյանի պաշտպանն այսօր իր պաշտպանական ճառում նշեց, որ իր պաշտպանյալի վերաբերյալ ամբողջ մեղադրանքը, բացի Թուրքիայում գտնվելու փաստից, մտացածին է, և դրա հեղինակներն են քննիչ Թևանյանը, դատախազ Արամ Ամիրզադյանն ու հակահետախուզության գլխավոր վարչության պետ Ս. Մելքոնյանը:
Պաշտպանի խոսքով՝ նախաքննության ընթացքում բազմաթիվ անգամներ խախտվել են իր պաշտպանյալի իրավունքները, Ռոմիկ Մաթևոսյանին ձերբակալել են՝ իբրև թե կասկածելով ՀՀ Քր.օր-ի 299 հոդվածով նախատեսված հանցագործություն կատարելու մեջ, իսկ նրանց համար ձերբակալելու հիմք է եղել այն, որ ականատեսը ուղղակի մատնանշել է նրան որպես քրեական օրենքով արգելված արարքը կատարողի. թե ով է ականատեսը կամ ինչ հանգամանքներ ու մանրամասներ է նա մատնանշել՝ այդպես էլ պարզ չի դարձել:
Ռոմիկ Մաթևոսյանի պաշտպանը դատարանին այսօր միջնորդեց նաև բացարկ հայտնել դատախազ Արամ Ամիրզադյանին, ով, ի դեպ, միջնորդել է դատարանին Ռոմիկ Մաթևոսյանին դատապարտել ազատազրկման` 12 տարի ժամկետով:
Պաշտպանը նաև դատավորին խնդրեց իր պաշտպանյալի իրավունքները վերականգնելու համար նրա նկատմամբ արդարացման դատավճիռ կայացնել, իսկ եթե անգամ դատավորը նման բան չորոշի, դատաքննության նոր փուլ սկսի և դատակոչի նաև քննիչ Թևանյանին:
Դատավոր Մնացական Մարտիրոսյանը դատախազի բացարկի վերաբերյալ միջնորդությունը քննարկելու համար 30 րոպեով ընդմիջում հայտարարեց, իսկ խորհրդակցական սենյակից վերադառնալուց հետո մերժեց բացարկի միջնորդությունը:
Դատական հաջորդ նիստը նշանակվել է ապրիլի 2-ին, ժամը 11.30-ին, որի ընթացքում արդեն ամբաստանյալները կհրապարակեն իրենց ճառերն ու ռեպլիկները:
