Չինաստանն անցած տարի ավելի շատ վարկ է տվել, քան Համաշխարհային բանկը

Չինաստանը նախորդ երկու տարիների ընթացքում զարգացող երկրներին տված վարկերի քանակով և ծավալով գերազանցել է Համաշխարհային բանկին: Այս մասին գրում է The Financial Times թերթը` հայտնելով, որ չինական երկու պետական բանկերը` China Development Bank-ը և China Export-Import Bank-ը 2009-2010 թթ. տրամադրել են 110 մլրդ դոլար:
Իսկ ահա Համաշխարհային բանկը 2008 թ. կեսից մինչև 2010 թ. վերջը տրամադրել է 100,3 մլրդ դոլար:
Վարկերի հիմնական մասը «գումար նավթի դիմաց» սկզբունքով տրվել է Ռուսաստանին (մոտ 25 մլրդ), Բրազիլիային և Վենեսուելային:
Մեծ գումարներ են հատկացվել նաև ենթակառուցվածքային բարեփոխումներին` ճանապարհաշինությանը: Օրինակ՝ Արգենտինայում կառուցվող երկաթգծի բազմամիլիարդանոց ծրագրի համար տրված վարկի դիմաց Չինաստանը պահանջել էր սարքավորումները գնել իր երկրից:
Թերթը գրում է, որ Համաշխարհային բանկը փորձում է Չինաստանի հետ լեզու գտնել, քանի որ շատ շուտով կարող է լուրջ մրցակցություն սկսվել վարկերի տրամադրման շուկայում, որովհետև Չինաստանն ավելի մատչելի պայմաններով է տրամադրում այդ վարկերը:
Նրա հնարավորություններն էլ ավելի են մեծանում, քանի որ երկրի արտարժութային և ոսկու պաշարները կազմում են 2,5 տրլն դոլար: