Բրիտանական «Wikileaks». Չերչիլը պատերազմի ժամանակ «դարդերը» խմիչքին էր տալիս

«Առաջին լրատվականն» արդեն տեղեկացրել է, որ Բրիտանիայում սկսել են գաղտնազերծվել 60 տարվա հնություն ունեցող պետական գաղտնի փաստաթղթերը: Բրիտանական մամուլը վերլուծել է այդպիսի փաստաթղթերից մեկը, որում Մեծ Բրիտանիայի վարչապետ Ուինսթոն Չերչիլի բուժող բժիշկը պատմել է երկրորդ աշխարհամարտի տարիներին վարչապետի հոգեկան վիճակի, նրա հիվանդությունների մասին: Ըստ բրիտանացիների` այդ հրապարակումը որոշակի առումով խամրեցրել է Չերչիլի վարկը Բրիտանիայում և աշխարհում: Եթե պատմությանը բրիտանական վարչապետը հայտնի է որպես Երկրորդ համաշխարհային պատերազմի հաղթանակի ճարտարապետներից մեկը, ապա այս բացահայտումից հետո Չերչիլը հանդես է գալիս իր մարդկային թուլություններով: Բժիշկ լորդ Մորենը իր գաղտնի օրագրերից մեկում գրել է, որ Չերչիլը պատերազմի ժամանակ բազմիցս հայտնվել է դեպրեսիայի մեջ: Նա օրերով չի զբաղվել պետական գործերով, ողջ գիշեր օգտագործել է ալկոհոլ և ծխախոտ: Երկու անգամ սրտի լուրջ տագնապ է ունեցել: Բրիտանացի պատմաբաններն այս բացահայտումից հետո հայտարարել են, թե, հավանաբար, Չերչիլի առողջական վիճակն է եղել պատճառը, որ վարչապետը չի կարողացել հանդիմանել Ստալինին հետպատերազմյան Եվրոպայի հետագա ճակատագրի հարցով:
Ինքը՝ Չերչիլը, մի անգամ ասել է, որ իր կյանքի ընթացքում «ինքն ալկոհոլից ավելին է վերցրել, քան ալկոհոլն իրենից»: