Ադրբեջանի գիտությունների ակադեմիայում գիտնականները մտահղացել են մարդկանց անունները դասակարգել 3 կարգի` լուսացույցի օրինակով: APA-ի հաղորդմամբ, «կանաչ լույս» կունենան բոլոր հեշտ ընթեռնելի և ընդունելի անունները: «Դեղին լույսի» տակ կլինեն այն անունները, որոնք խորհուրդ չի տրվում դնել. ունեն սովետական գաղափարախոսությանը բնորոշ տարրեր: Իսկ ահա անթույլատրելի կհամարվեն այն անունները, որոնք չեն գրվի լատինատառ, կլինեն արտասանության համար շատ բարդ:
Ներկայացված պահանջներից մեկն էլ անունների երկարությունն է: Ներկայացվելու են նաև իմաստաբանական պահանջներ, մասնավորապես՝ ադրբեջանցիները չեն կարողանա իրենց երեխաներին անվանակոչել այնպիսի անուններով, որոնք արտասանելը կարող է անպարկեշտ լինել հասարակական վայրերում կամ վիրավորել մարդկանց հոգևոր արժեքները: Պետք է նշել, որ փոփոխությունները վերաբերելու են միայն ազգությամբ ադրբեջանցի քաղաքացիներին: Փոփոխություններով զբաղվում է Ադրբեջանի արդարադատության նախարարությունը: