Microsoft-ն ու Nokia-ն կֆինանսավորեն AppCampus պրոֆեսիոնալ ծրագիրը բջջային ծրագրեր մշակողների համար: Ընկերություններից յուրաքանչյուրը կներդնի մինչև 9 միլիոն եվրո: Այս մասին ասվում է «Lenta.ru»-ի մամուլի հաղորդագրության մեջ:
Ըստ Computerworld-ի՝ ծրագիրը մեկնարկում է 2012 թ. մայիսին և կտևի 3 տարի:
Ծրագրին կարող են մասնակցել Windows Phone 7, Symbian և S40 համար ծրագրեր մշակողները: Դիմել կարող են տարբեր երկրների բնակիչներ:
Ըստ կազմակերպիչների՝ գումարը, որը ծրագրավորողները կարող են ակնկալել, կախված կլինի տրամադրված ծրագրերի որակից:
Microsoft-ը Windows Phone 7 բջջային օպերացիոն համակարգը ներկայացրել է 2010 թ. աշնանը: 2011 թ. փետրվարին Nokia-ն այն ընտրել է որպես հիմնական պլատֆորմ իր սմարթֆոնների համար:
WP7 ծրագրերը տարածվում են Marketplace ինտերնետ խանութի միջոցով: Այժմ WP7-ում առկա է ավելի քան 70 հազար ծրագիր:
