Մարտի 28-ին Կենտրոն և Նորք-Մարաշ վարչական շրջանների ընդհանուր իրավասության դատարանում, դատավոր Մխիթար Պապոյանի նախագահությամբ, կշարուկակվնի 2010 թ. հունվարի 10-ին Մոսկվա կինոթատրոնում գողություն կատարելու մեղադրանքով ձերբակալված Ստեփան Հովակիմյանին «հանցակցած» Վահրամ Քերոբյանի դատավարությունը:
Հիշեցնենք, որ Ստեփան Հովակիմյանը մեղադրվում է իր ընկերոջ` Վահրամ Քերոբյանի հետ միասին «Մոսկվա» կինոթատրոնում 2010 թ. հունվարի 10-ին կատարված գողությունը կազմակերպելու և իրականացնելու մեջ` ՀՀ քր. օր-ի 38-րդ հոդվածի 3-րդ մասով և 177-րդ հոդվածի 3-րդ մասի 1-ին կետով: Քր. գործը գտնվում է Կենտրոն և Նորք Մարաշ դատարանում:
Դատավարությունը մինչև ս.թ. հունվարի 11-ը վարում էր դատավոր Արմեն Խաչատրյանը, այժմ գործի վարույթը հանձնվել է դատավոր Մխիթար Պապոյանին: Ըստ մեղադրանքի` գողացվել է 5 մլն 80 հազար դրամ և 10 հազար ռուսական ռուբլի: 32-ամյա Ստեփան Հովակիմյանն ու 28-ամյա Վահրամ Քերոբյանն արդեն 2 տարի է՝ պահվում են «Նուբարաշեն» քրեակատարողական հիմնարկում, սակայն մինչ օրս որևէ վարույթ չի հարուցվել ձերբակալման առաջին օրերին Ստեփան Հովակիմյանի նկատմամբ խոշտանգումներ իրականացնելու մասին վերջինիս հայտարարությունների վերաբերյալ:
Ստեփան Հովակիմյանի և Վահրամ Քերոբյանի գործի վարույթի երկարաձգման և իրավապահ մարմինների ներկայացուցիչների կողմից Ստեփան Հովակիմյանի նկատմամբ խոշտանգումների իրականացման կասկածանքի առնչությամբ Մարդու իրավունքների միջազգային ֆեդերացիայի և «Քաղաքացիական հասարակության ինստիտուտ» հասարակական կազմակերպության կողմից Մարդու իրավունքների եվրոպական դատարան հայց է ներկայացվելու:
Ինչպես հայտնում է Ստեփայն Հովակիմյանի փաստաբան Տիգրան Սաֆարյանը` քրեական գործում առկա են որոշ հակասություններ: Մասնավորապես այն, որ «Մոսկվա» կինոթատրոնի երկու տարբեր տեսախցիկներ ֆիքսել են գողության կատարման երկու տարբեր ժամ` 03.15 – 00.12, իսկ քրեական գործում գողության ժամ է գրանցվել 23.30-ը, բացի դրանից` «Մոսկվա» կինոթատրոնի տեսախցիկների կադրերում երևացող երիտասարդի ինքնությունը պարզված չէ, արտաքնապես նա նման չէ ո՛չ Հովակիմյանին, ո՛չ Քերոբյանին:
Փաստաբան Սաֆարյանը գործի նման դանդաղ ընթացքը պայմանավորում է նրանով, որ դատարանը վերջում, վճիռ կայացնելով, մեղավոր կճանաչի մեղադրյալներին, և քանի որ նրանք արդեն գրեթե պատիժը կրել են, ազատ կարձակվեն դատարանի դահլիճից, իսկ այդ դեպքում այլևս չեն բողոքարկի:
