Այսօր Երևանի փողոցներում կարելի է հանդիպել ժամանակակից Կարա-Բալային, որն իր նախատիպից տարբերվում է նրանով, որ շրջում է լույսերով, փուչիկներով ու փայլերով զարդարված մոտոցիկլետով և ծաղիկներ այնքան էլ հաճախ չի նվիրում: 25-ամյա Վարդան Հովհաննիսյանը 8 տարեկանից ծաղիկ է վաճառում։ Նրա խոսքերով, ծաղիկների աշխարհը շատ գրավիչ է. «Ինձ շատ հաճախ են նմանեցնում Կարա-Բալային։ Ճիշտ է, ես ծաղիկները չեմ նվիրում, այլ վաճառում եմ, բայց լինում են դեպքեր, երբ հասկանում եմ, որ նրանց շատ դուր է եկել ծաղկեփունջը, բայց գնելու հնարավորություն չունեն, նվիրում եմ»:
Այսօր Վարդանին կարելի է տեսնել գարնան ավետաբերներ`ձնծաղիկներ վաճառելիս: Զարմանալի է ձմռան այս ամսին ձնծաղիկներ տեսելը, սակայն Վարդանն ասում է, թե պետք չէ զարմանալ, քանի որ ձնծաղիկները Հայաստանից չեն, այլ Ղարաբաղից. «Իմ ձնծաղիկները Ղարաբաղից են, ընկերս ուղարկում է, ես էլ վաճառում եմ: Այնտեղ ձնծաղիկները շուտ են ծաղկում»: Մոտոցիկլետով Կարա-Բալան ծաղիկներ վաճառելիս նաև խորհուրդներ է տալիս, թե ինչպես ճիշտ խնամել դրանք:
Վարդանը միայն մի ցանկություն ունի, որ մի օր առավոտյան կարթնանա և բոլոր ծաղիկները կնվիրի Երևանի գեղեցկուհիներին. «Ես գիտեմ, որ այդ օրը կգա, հույս ունեմ, բայց թե երբ…»: