Կուսակցությունների նախընտրական ցուցակներում ընդգրկված թեկնածուները բավականին բազմազան են՝ ավանդական պատգամավորներից, նախարարներից, մարզպետներից մինչև բանվորուհիներ ու երգչուհիներ: Թե որքանո՞վ են կուսակցությունները կարևորել ապագա խորհրդարանում տնտեսական մտքի առկայությունը, վիճելի հարց է, ու թեև ՀՀԿ ղեկավարությունը խոստացավ համամասնականով խորհրդարան գործարարներ չտանել, այնուամենայնիվ, մեծամասնականով առաջադրվածները, ընտրվելու դեպքում, մայիսի 6-ից հետո համալրելու են նույն ՀՀԿ կազմը, և արդյունքը նույնն է լինելու՝ գործարար-օլիգարխներով հարուստ Ազգային ժողով: Մինչդեռ երկրի տնտեսական ներկայիս ծանր պայմաններում տնտեսական լուրջ մտքի առկայության կարիք կա խորհրդարանում, որը ոչ թե իր սեփական բիզնես-շահից, այլ հանրության շահերից կգործի:
ՀՀԿ պատգամավոր, տնտեսագիտության թեկնածու Սուքիաս Ավետիսյանն «Առաջին լրատվական»-ի հետ զրույցում վստահեցրեց, որ ՀՀԿ ցուցակում տնտեսական ուժը «շատ էլ լավ արտահայտված է», և կարծում է, որ մյուսներն էլ են ընգրկել տնտեսագետների: Նա նշեց, որ ընդհանրապես ցուցակներում բոլոր բնագավառներն էլ պետք է լինեն`թե՛ քաղաքականը, թե՛ տնտեսականը, թե՛ մշակութայինը և այլն:
Նկատենք, որ գործադիրի կազմում տնտեսական առանցքային ճյուղերը` էներգետիկան, էկոնոմիկան և ֆինանսները ղեկավարող անձինք՝ Արմեն Մովիսիյանը, Տիգրան Դավթյանը և Վաչե Գաբրիելյանը, ՀՀԿ ցուցակում զբաղեցնում են 45-րդ, 47-րդ և 48-րդ տեղերը: Իսկ, ահա, հանրահայտ Սամվել Ալեքսանյանը ցուցակում 159-րդն է, Մանվել Բադեյանը՝ 173-րդը, Հակոբ Հակոբյանը՝ 190-րդը և այլն: Ընդ որում, ՀՀԿ ցուցակ կազմողներն այս հայտնի գործարարներին համեստորեն մղել են ետին հորիզոնականներ` ընտրողների աչքերը չծակելու համար:
