ԱՄՆ նախագահ Օբամայի և Ռուսաստանի նախագահ Մեդվեդևի ոչ պաշտոնական զրույցը հաղորդվել է չանջատված բարձրախոսով. այսօր ամերիկյան բոլոր լրատվամիջոցները քննարկում են այս սկանդալը: Զրույցը լուրջ խնդիրներ է առաջացրել ԱՄՆ նախագահի համար:
Լրագրողները պատահաբար ձայնագրել են Սեուլում տեղի ունեցած այդ խոսակցությունը: Օբաման զրույցի ժամանակ Մեդվեդևին ասել է. «Սրանք իր վերջին ընտրություններն են, որից հետո ինքը խուսանավելու ավելի շատ հնարավորություններ կունենա»: «Ես հասկանում եմ… Ես դա կփոխանցեմ Վլադիմիրին»,- ի պատասխան՝ ասել է Մեդվեդևը: Լրատվամիջոցներում այս լուրը քննարկման լուրջ առարկա է դարձել, իսկ հանրապետականները մեղադրել են Օբամային պետական շահերը դավաճանելու մեջ:
Հիշեցնենք, որ Օբամայի և Մեդվեդևի հանդիպման հիմնական թեմաներից են եղել հակաօդային պաշտպանության խնդիրները, և, հավանաբար, մանևրելու վերաբերյալ արտահայտված միտքը կապված է եղել այս հանգամանքի հետ:
«Թույլ տվեք, որ ես լինեմ կոշտ քաղաքական գործիչ, որպեսզի վերընտրվեմ»,- Օբամայի խոսքը լսելուց հետո հեգնել է Նյութ Գինգրիչը, որը Կոնգրեսի ներկայացուցիչների պալատի խոսնակն է և Օբամայի հիմնական հակառակորդներից մեկը նախագահական ընտրությունների ժամանակ: «Նման մեկնաբանություններից մարդու մարմինը փշաքաղվում է»,- ասել է Գինգրիչը լրագրողներին:
«Եվ սա ԱՄՆ նախագահն է: Նա, ըստ էության, պետք է հոգ տանի ԱՄՆ ռազմական անվտանգության համար: Նա ռուսին ասում է, որ կարող է զիջումների գնալ (ՀՕՊ հարցում- խմբ.), սակայն ներկա պահին դրա մասին չի կարող հայտարարել: Մենք Օբամայից բացատրություն պետք է պահանջենք»,- հավելել է Գինգրիչը:
