Այսօր, երբ արդեն մեծամասնական ընտրակարգով թեկնածուների առաջադրման փուլն ավարտված է և հայտնի են 41 ընտրատարածքներում առաջադրված թեկնածուների անունները, «Առաջին լրատվական»-ին հայտնի է դարձել, որ Շիրակի մարզի թիվ 34 ընտրատարածքում առաջադրված ԲՀԿ-ական Մարտուն Գրիգորյանն իր Հանրապետական մրցակցի դեմ որոշել է պայքարել արդեն ավանդական դարձած ձայներ «փոշիացնելու» եղանակով՝ նույն ընտրատարքծում հանրությանն անհայտ, բայց միևնույն անուն-ազգանունով անձի «խաղի» մեջ ներքաշելով:
Շիրակի մարզի թիվ 34 ընտրատարածքում, ինչպես հայտնի է, մեծամասնական ընտրակարգով թեկնածուներ են առաջադրել և’ ՀՀԿ-ն, և’ ԲՀԿ-ն, և’ Հայ Ազգային կոնգրեսը:
Հանրապետականի թեկնածուն «Շիրակ» ֆուտբոլային ակումբի սեփականատեր, Արման Սահակյանն է, ԲՀԿ-ն սատարում է գործող պատգամավոր Մարտուն Գրիգորյանին, իսկ ՀԱԿ-ը` Մուրադ Գրիգորյանին:
«Առաջին լրատվական»-ի տեղեկություններով, Մարտուն Գրիգորյանի ջանքերով այս ընտրատարածքում ոմն Արման Սահակյան փորձել է առաջադրվել որպես թեկնածու, սակայն առաջադրման վերջնաժամկերտից րոպեներ րոպե առաջ վերջինիս փորձը կանխվել է:
Արման Սահակյանի մամուլի քարտուղար Աննա Թադևոսյանը մեզ հետ զրույցում չհերքեց այս տեղեկատվությունը: «Մեր կողմից միայն մեկ թեկնածու կա, մյուսը գաղափար չունենք, թե ով է եղել»,- ասաց նա:
