Իսրայելի Գերագույն դատարանը մարտի 25-ին հրաժարվել է Հորդանան գետի Արևմտյան ափին տեղակայված Միգրոն հրեական բնակավայրը քանդելու աշխատանքները հետաձգել մինչև 2015 թ.: Այս մասին գրում է իսրայելական Haaretz թերթը:
Ավելի վաղ դատարանը վճռել էր մինչև 2012 թ. մարտ քանդել Միգրոն բնակավայրը: Դատավճռում ասվում էր, որ իսրայելցիներն ապօրինի բնակություն են հաստատել պաղեստինյան մասնավոր տարածքներում: Ավելի ուշ Միգրոնի բնակիչները կառավարության հետ ստորագրեցին համաձայնագիր՝ բնակավայրը մեկ այլ տարածք տեղափոխելու շուրջ:
Իսրայելի կառավարությունը վարչապետ Բենյամին Նեթանյահուի գլխավորությամբ փոխզիջում ձեռք բերելու համար խնդրել էր Գերագույն դատարանին թույլատրել Միգրոնի բնակիչներին մնալ բնակավայրում մինչև 2015 թ. նոյեմբեր՝ մինչև որ նրանց համար նոր տներ կառուցվեն այլ տարածքներում: Մարտի 25-ին դատարանը հրաժարվեց բավարարել Նեթանյահուի հայցը՝ պատճառաբանելով, որ դրա համար հիմք չի տեսնում: Միգրոնի բնակիչներին, սակայն, թույլատրվել է մնալ իրենց տներում ավելի երկար, քան նախատեսվում էր՝ մինչև 2012 թ. օգոստոս:
Իսրայելի կառավարությունը պատրաստվում է Միգրոնի բնակիչներին առաջարկել ժամանակավորապես բնակություն հաստատել Երուսաղեմից 5 կմ հյուսիս գտնվող Ադամ բնակավայրի շարժական տներում: Իսրայելցիների համար ժամանակավոր տների նախապատրաստման աշխատանքները կավարտվեն մի քանի ամսում:
Միգրոն բնակավայրը գտնվում է Երուսաղեմից 14 կմ հյուսիս և ստեղծվել է 10 տարի առաջ: Չնայած դատարանի այն որոշմանը, որ տարածքն անօրինական է զբաղեցված, Միգրոնի բնակիչները հայտարարում են, որ պաղեստինցիները չեն ապացուցել իրենց իրավունքն այդ տարածքների վրա: Բացի այդ, իսրայելցիները նշում են, որ բնակավայրի ստեղծման ժամանակ իրենց օգնել է երկրի կառավարությունը:
Հորդանան գետի Արևմտյան ափին հրեական բնակավայրերի շինարարաությունը Իսրայելի և Պաղեստինի ինքնավարության միջև հակամարտության առանցքային հարցերից մեկն է: Պաղեստինցիները պնդում են, որ այդ հողերն իրենց են պատկանում և պահանջունմ են ազատել դրանք: Պաղեստինը այդ տարածքների ազատումը համարում է Իսրայելի հետ բանակցություններ սկսելու պայմաններից մեկը:
