«Առաջին լրատվական»-ի հետ զրույցում Երևանի քաղաքապետի մամլո խոսնակ Շուշան Սարդարյանը նշեց, որ Երևանի քաղաքապետարանի աշխատակազմի կառուցվածքում փոփոխություններ են լինելու. «Երևանի քաղաքապետ Կարեն Կարապետյանն ավագանու դիտարկմանը կներկայացնի քաղաքապետարանի աշխատակազմի կառուցվածքում փոփոխություններ և լրացումներ կատարելու վերաբերյալ առաջարկությունների նախագիծը, ինչը ենթադրում է որոշակի լրացումներ»: Ըստ այդ նախագծի` Երևանի քաղաքապետը Տարոն Մարգարյանից, Վանո Վարդանյանից և Կամո Արեյանից բացի կունենա ևս մեկ տեղակալ` ֆինանսական գծով: Նաև կվերստեղծվի Երևանի գլխավոր դիզայների պաշտոնը, որն առաջին անգամ ստեղծել էր նախկին քաղաքապետ Վանո Սիրադեղյանը: Այդ պաշտոնը 1997թ. ստանձնել էր Սամվել Սևադան, ով Հայաստանից փախավ առաջին նախագահ Լևոն Տեր-Պետրոսյանի հրաժարականից անմիջապես հետո:
Մամլո խոսնակը չհերքեց և ոչ էլ հաստատեց, այն շրջանառվող լուրերը, ըստ որոնց Երևանի քաղաքապետարանի աշխատակազմի քարտուղարի պաշտոնը պետք է ստանձնի Վահե Ստեփանյանը, իսկ գլխավոր ճարտարապետ է նշանակվելու Միքայել Հասրաթյանը: