Չինաստանում համացանցից օգտվողներին հաջողվել է խուսափել գրաքննությունից տեղական միկրոբլոգ ծառայություններում՝ քաղաքական գործիչների անունների փոխարեն ծածկանուններ օգտագործելով: Այս մասին տեղեկացրել է The Guardian-ը:
Այսպես, երկրի վարչապետ Վեն Ցզյաբաոյի անվան փոխարեն միկրոբլոգում սկսել են օգտագործել «տելեպուզիկ» բառը, իսկ մարտի կեսերին հրաժարական տված կոմունիստական կուսակցության ղեկավարի՝ Բո Սիլայի, անվան փոխարեն՝ «լոլիկ»:
Կոդավորումը օգտագործվում է այն խոսակցությունների հրապարակման համար, որոնք սկսել էին տարածվել Բո Սիլայի՝ Չինաստանի ամենահայտնի քաղաքական գործիչներից մեկի, հրաժարականից հետո:
Միջադեպից մի քանի օր հետո Բո Սիլայի անունը դեռ հասանելի էր միկրոբլոգի որոնման համար, սակայն ավելի ուշ այն արգելափակվեց: Բացի այդ, ըստ Associated Press-ի, որոշ ինտերնետ ռեսուրսների հանձնարարվել է վերացնել բոլոր հոդվածներն անգամ Չունցին քաղաքի մասին, որի կոմունիստական կուսակցության ղեկավարը Բո Սիլան է:
Այժմ, ըստ The Guardian-ի, չինական միկրոբլոգում տիպիկ քաղաքական գրառումն ունի հետևյալ տեսքը. «Մի քանի օր առաջ Պեկինում տեղի է ունեցել պարանի ձգման մրցույթ ծերունիների միջև: Խաղին մասնակցել է 9 մարդ: «Տելեպուզիկների» թիմն զգալի առավելություն ունի, իսկ «Կոնգայի վարպետները» հեռու են հաղթանակից»: Այս գրառման մեջ խոսքը Չինաստանի կոմունիստական կուսակցության կենտրոնական կոմիտեի Քաղաքական բյուրոյի մշտական հանձնաժողովի համագումարի մասին է:
