Ինչպես տեղեկացնում է ИТАР-ТАСС գործակալությունը, Ռուսաստանը մտադիր է զարգացնել ատոմային էներգետիկան` որպես երկրի զարգացման ռազմավարական ուղիներից մեկը: Այս մասին ընդգծվում է ՌԴ 2012թ. ատոմային անվտանգության հարցերին նվիրված գագաթնաժողովում ընդունված հուշագրում: Փաստաթղթի տեքստն այսօր հրապարակվել է ՌԴ արտգործնախարարության կայքէջում:
«Ռուսաստանը հաստատում է իր մտադրությունը` զարգացնել ատոմային էներգետիկան` որպես երկրի զարգացման ռազմավարական ուղղություն,- ընդգծվում է փաստաթղթում: – Մենք համոզված ենք, որ չնայած «Ֆուկուսիմա-1» ԱԷԿ-ում ծանր վթարին, ապագայում ատոմային էներգետիկային այլընտրանք չկա: Առանց դրա անհնար է պատասխանել մարդկության էներգետիկ պահանջմունքների բավարարման մարտահրավերին»:
«Այսօրվա դրությամբ էներգիայի բոլոր նշանակալից աղբյուրներից միայն ատոմային էներգետիկան է ոչ միայն էկոլոգիապես ու տնտեսապես շահավետ, այլև անվտանգ, բնական է, դրա նկատմամբ պատասխանատու վերաբերմունքի պարագայում»,- նշվում է հուշագրում:
«Այսօրվա դրությամբ դրա օգտագործման պարտադիր պայման է անվտանգության բարձր աստիճանի ապահովումը»,- ընդգծված է հուշագրում:
Հաշվի առնելով «Ֆուկուսիմա-1» ԱԷԿ-ում տեղի ունեցած վթարից քաղած դասերը՝ Ռուսաստանում 2011թ. անցկացվել են սթրես-թեստեր բոլոր ռուսական գործող ատոմակայաններում, ինչպես նաև ստուգումներ են անցկացվել ԱԷԿ-ի օպերատորների համաշխարհային ասոցիացիայի հետ: Դրան մասնակցել են Ֆրանսիայի, ԱՄՆ-ի, Հունգարիայի, Ուկրաինայի, ինչպես նաև ՄԱԳԱՏԷ-ի մասնագետները, նշված է փաստաթղթում: Ռուսաստանի Դաշնությունը համոզված է միջուկային անվտանգության ապահովման հարցում միջազգային իրավական նորմերի պահպանման անհրաժեշտության մեջ:
Բացի այդ `հուշագրում նշված է, որ Ռուսաստանն ամբողջությամբ կատարում է միջազգային պարտավորությունները միջուկային զինաթափման շրջանակում:
Հուշագրում նաև նշված է, որ Ռուսաստանին անհանգստացնում է այն, որ աշխարհում պահպանվում է միջուկային ահաբեկչությունը: Նշվում է, որ Ռուսաստանը պաշտպանում է ՄԱԳԱՏԷ-ի գործունեությունը` աշխարհում միջուկային անվտանգությունը պահպանելու հարցում:
