News Georgia-ի փոխանցմամբ՝ Վրաստանի արտգործնախարար Գրիգոլ Վաշաձեն հերքել է «Ազատ դեմոկրատներ» կուսակցության առաջնորդ Իրակլի Ալասանիայի այն տեղեկատվությունը, թե Վրաստանի նախագահ Միխեիլ Սաակաշվիլիի կարգադրությամբ պաշտպանության նախարար Բաչո Ախալայայի հայրը Վրաստանի արևմուտքում զբաղված է ապօրինի զինված խմբեր ստեղծելով, որոնք նախատեսված են ընդդիմադիրներին ահաբեկելու համար:
Հիշեցնենք, որ Ալասանիայի հայտարարությունից հետո իր մտահոգությունն էր հայտնել Աբխազիայի ԱԳՆ-ն: Այս կապակցությամբ Վաշաձեն հայտարարել է.
«Ես մտադիր չեմ մեկնաբանություններ անել օկուպացիոն ռեժիմի արած հայտարարության վերաբերյալ: Իսկ ինչ վերաբերում է մեր մի շարք ընդդիմադիր գործիչների հերյուրանքներին, ապա ես խորհուրդ եմ տալիս վերջ դնել այդ շիզոֆրենիկ անհեթեթությանը, առավել ևս, որ գոյություն չունի այդ մասին որևէ ապացույց»:
