ՀՀ նախկին արտգործնախարար Ալեքսանդր Արզումանյանը, մամուլի ասուլիսի ժամանակ ամփոփելով տարին, հայտարարեց, որ Լեռնային Ղարաբաղի շուրջ շարունակվեցին իմիտացիոն գործընթացները, երկկողմ, եռակողմ, բազմակողմ հանդիպումներ եղան: Նա հիշեցրեց, որ այդ ամենի արդյունքում 2009 թվականի վերջում ԵԱՀԿ նախարարների խորհրդում ընդունվեց մի ձևակերպում, որի համաձայն` ԼՂ-ի ապագա ինքնորոշման իրականացումը պետք է տեղի ունենա Ադրբեջանի տարածքային ամբողջականության սահմաններում: Նախկին արտգործնախարարի դիտարկմամբ` հետագա հանդիպումներն ընթացան այդ ոգով: Ըստ Ալեքսանդր Արզումանյանի` ՀՀ ԱԳՆ-ն 2008 թ. մարտի 1-ից հետո զբաղված է այնպիսի գործառույթներով, որ Հայաստանի նկատմամբ չկիրառվեն սանկցիաներ: Մինչդեռ նախկին արտգործնախարարը հիշեցնում է, որ Ադրբեջանն այս ընթացքում զբաղված է Լեռնային Ղարաբաղի հարցն այլ ատյաններում արծարծելով:
Պատասխանելով Սուդանում տեղի ունեցած անկախության հանրաքվեին վերաբերող լրագրողների հարցին` Ալեքսանդր Արզումանյանը նշեց, որ այդ հարցը պետք է դիտարկել ՄԱԿ-ի հովանու ներքո ապագաղութացման գործընթացների համատեքստում: «Ցավոք, այն չի վերաբերում մեզ: Պետք է գիտակցել, որ ինքնորոշումը դիտարկվում է ՄԱԿ-ի ապագաղութացման գործընթացի մեջ: Դրա համար ՄԱԿ-ում ստեղծվել են տարբեր կառույցներ»,- ասաց նախկին արտգործնախարարը: Ինչ վերաբերում է Արևելյան Եվրոպայի երկրներին, նախկին արտգործնախարարը հիշեցնում է, որ նրանց դեպքում կիրառելի են Հելսինկյան եզրափակիչ ակտի սկզբունքները` ազգերի ինքնորոշում, ուժի չկիրառում և տարածքային ամբողջականություն: Ալեքսանդր Արզումանյանը նշեց, որ Կոսովոն, Աբխազիան և Հարավային Օսիան մեզ համար ավելի ընդունելի նախադեպ են: