ԱՄՆ-ը պատրաստակամություն է հայտնել օգնելու Ուկրաինային բանակի բարեփոխման հարցում: Այսպիսի հայտարարություն է արել այս երկրում ԱՄՆ արտակարգ և լիազոր դեսպան Ջոն Թեֆթը մարտի 22-ին երկրի պաշտպանության նախարար Դմիտրի Սալամատինի հետ հանդիպումից հետո: Այս մասին հաղորդում է RBC-ն` հղում կատարելով Ուկրաինայի պաշտպանական գերատեսչության մամուլի ծառայությանը:
«Միջազգային զորավարժությունների, խաղաղության ապահովման և անվտանգության ամրապնդման այլ միջոցառումների մեր փոխգործակցությունը նպաստում է միջազգային իրավիճակի բարելավմանը»,- ասել է դիվանագետը` հավելելով, որ ողջունում է Ուկրաինայի խաղաղարար նախաձեռնությունները:
Սալամատինն իր հերթին նշել է, որ ներկայումս ավարտվում է մինչև 2017թ.-ը Ուկրաինայի զինված ուժերում բարեփոխումներ իրականացնելու հայեցակարգի մշակումը, որով նախատեսվում է ստեղծել մոբիլ, արդյունավետ բանակ, որը համապատասխանում է ներկայիս պահանջներին և մարտահրավերներին: ՊՆ ղեկավարն ասել է, որ բանակը կազմավորվելու է բացառապես պայմանագրային զինծառայողներից:
