Բնապահպանության նախարարությունը կպարզի Սոթքի ոսկու հանքավայրի ջարդիչ-տեսակավորող համալիրի օրինականությունը, «Առաջին լրատվական»-ի հետ զրույցում տեղեկացրեց ՀՀ բնապահպանության նախարարության ընդերքի և հողերի պահպանության քաղաքականության վարչության պետ Վիգեն Ավետիսյանը:
Նա նշեց, որ օրերս բնապահպանության նախարար Արամ Հարությունյանը խորհրդակցություն է անցկացրել, և համապատասխան հանձնարարականներ են տրվել` առաջիկա օրերին հանքավայր այցելելու համար: «Հասարակական կազմակերպությունները դիմել են այս խնդրով վարչապետին: Վարչապետը հանձնարարական է տվել, ստեղծվել է հանձնաժողով, և աշխատանքներ պետք է կատարվեն` տեղում հարցն ուսումնասիրելու. պետք է որոշվի, թե որ օրենքն է խախտվել»,- մանրամասնեց Վիգեն Ավետիսյանը:
«Առաջին լրատվական»-ի հետ զրույցում «Բնապահպանական փորձաքննություն» ՊՈԱԿ-ից Կարինե Մովսիսյանն ասաց, որ շատ վաղօրոք եղել է ֆաբրիկայի նախագիծը, որը ներկայացվել է ՊՈԱԿ, և որին տրվել բացասական եզրակացություն: Ըստ նրա` ջարդիչ սարքերի հետ կապված ոչ մի փաստաթուղթ չի ներկայացվել փորձաքննության: «Օրենքը նախատեսում է համապատասխան փաստաթղթերի դեպքում անցկացնել բնապահպանական փորձաքննություն, և գործունեությունն իրականացնել միայն դրական փորձաքննության եզրակացության առկայության դեպքում: Եթե իրենք չեն ներկայացրել, մենք ոչինչ չենք կարող անել»,- մեկնաբանեց Կ. Մովսիսյանը:
Հայաստանի Կանաչների միության նախագահ Հակոբ Սանասարյանի կարծիքով` արդեն բավական ուշ է` նոր փորձաքննություն իրականացնելու համար, քանի որ ջարդիչ սարքը շահագործվել է դեռևս անցյալ տարվանից: «Շահագործման վերաբերյալ բողոքով դիմել ենք գլխավոր դատախազին, դեռևս պատասխան չենք ստացել»,- ասաց Հ. Սանասարյանը:
Հիշեցնենք, որ Սոթքի հանքավայրում ջարդող- տեսակավորող համալիրն աշխատում է դեռևս 2011թ. մայիսից` առանց բնապահպանական փորձաքննության եզրակացության: Բնապահպանների պնդմամբ` այն խախտում է Սևանի ավազանի էկոմիջավայրը, որը մեծ արժեք է Հայաստանի բնաշխարհում:
