McDonald’s-ի գլխավոր տնօրեն Ջիմ Սքիները հայտարարել է, որ հրաժարական է տալիս իր պաշտոնից: Այս մասին հաղորդում է Reuters գործակալությունը: Նա այդ պաշտոնից կհրաժարվի 2012թ.-ի հուլիսի 1-ին: Նրան կփոխարինի ընկերության գործադիր տնօրեն Ջոն Թոմսոնը:
Պաշտոնական հաղորդագրության մեջ շնորհակալություն է հայտնվում Սքիներին, որի օրոք ընկերությունը մեծ հաջողությունների է հասել, իսկ McDonald’s-ի կապիտալիզացիան հասել է 100 միլիարդ դոլարի:
Սքիներն ընկերությունում աշխատել է 41 տարի, որից վերջին 8 տարիների ընթացքում ղեկավարել է այն: Հենց նա է 2003թ.-ին առաջարկել «հաղթական ծրագիրը», որը նախատեսում էր ողջ աշխարհում McDonald’s-ի ռեստորաններում աշխատանքի որակի բարելավում: Մասնագետները կարծում են, որ հենց նրա օրոք է ավելացել McDonald’s-ի ճաշացանկը, իսկ արագ սննդի կետերը դարձել են ավելի ժամանակակից: