Լուժկովը բնակվելու վայր է փնտրում

Ըստ լատվիական TV3 հեռուստաընկերության՝ կիրակի երեկոյան հայտնած լուրի՝ Մոսկվայի նախկին քաղաքապետ Յուրի Լուժկովը դիմում է գրել Լատվիայում կացության իրավունք ստանալու համար:
Ըստ հեռուստաընկերության` այդ դիմումը նա անցյալ տարվա վերջին ներկայացրել է ՌԴ-ում գտնվող Լատվիայի դեսպանատուն:
Ինչպես նշում է լատվիական Delfi ինտերնետային կայքը, նախկին քաղաքապետն օրինական հիմքեր ունի քաղաքացիություն ստանալու համար, քանի որ նա Rietumu Bank է փոխանցել 200 հազար լատ (մոտավորապես 400 հազար դոլար): Բացի այդ, Լուժկովը Լատվիայում ունի անշարժ գույք:
ՆԳ նախարար Լինդա Մուրցիեցեյի խոսքերով, ճշտվում է Լուժկովի փոխանցած գումարի ֆինանսական աղբյուրը: Delfi-ն գրում է, որ դրա համար նրանք կապվել են ռուսական իշխանությունների հետ:
«Իրավապահ մարմինները ստուգում են նաև Լուժկովի մասին ունեցած մեկ այլ տեղեկություն, և կարծում եմ, որ այս կամ այն իրավական պատճառները բավական կլինեն, որպեսզի հիմք գտնվի և նրա դիմումը մերժվի»,- ասել է նախարարը TV3-ին տված հարցազրույցում:
2010 թ. հուլիսի 1-ից Լատվիայում արդեն ուժի մեջ ներգաղթի մասին օրենքում փոփոխությունները, որոնք հնարավորություն են տալիս արտասահմանցուն ստանալ քաղաքացիություն Լատվիայում, եթե նա երկրում գնում է անշարժ գույք 50 հազարից 100 հազար լատ (100 հազարից 200 հազար դոլար) արժողությամբ, կամ գրանցում ընկերություն և կամ էլ 200 հազար լատի (400 հազար դոլար) բանկային հաշիվ բացում:
Հիշեցնենք, որ 2010թ. սեպտեմբերի 28-ին նախագահ Մեդվեդևի հրամանագրով Լուժկովը հեռացվել էր զբաղեցրած պաշտոնից «վստահությունը կորցնելու» պատճառով: Դեկտեմբերի վերջին երեք հեռուստաընկերությունների տված հարցազրույցի ժամանակ Մեդվեդևը դա բացատրել է մայրաքաղաքում կոռուպցիայի բարձր մակարդակով:
Որոշ ԶԼՄ-ի տվյալներով, Լուժկովը բրիտանական վիզա ստանալու համար թղթեր է ներկայացրել: