Ռուսաստան –ՆԱՏՕ խորհրդի գագթնաժողովը Չիկագոյում անցկացնելը «դժվար կլինի Ռուսաստանի լարված ներքաղաքական իրավիճակի պատճառով»: Այս մասին, ինչպես հաղորդում է ИТАР-ТАСС-ը, հայտարարել է ՆԱՏՕ-ի գլխավոր քարտուղար Անդերս Ֆոգ Ռասմուսենը՝ Չեռնոգորիայի վարչապետի հետ հանդիպումից հետո տեղի ունեցած մամլո ասուլիսի ժամանակ` պատասխանելով լրագրողների հարցերին:
«Անձամբ քննարկել եմ ՌԴ ընտրված նախագահ Վլադիմիր Պուտինի հետ Չիկագոյում կայանալիք հանդիպման հեռանկարները, և մենք եկել ենք փոխըմբռնման, որ այդ գագաթնաժողովի անցկացման ժամանակն ընտրելը դժվար կլինի Ռուսաստանի լարված ներքաղաքական իրավիճակի պատճառով»,- հայտնել է Ռասմուսենը: Նա չի հստակեցրել, թե կոնկրետ ինչ ի նկատի ունի:
Միաժամանակ նա ընդգծել է, որ Ռուսաստանը և ՆԱՏՕ-ն նպատակաուղղված են շարունակել ակտիվ երկխոսությունը: «Մենք պայմանավորվել ենք, որ երկկողմանի հանդիպում կունենանք ՌԴ նախագահի իր պաշտոնը ստանձնելուց հետո, երբ որ հնարավոր լինի: Բացի այդ, կարող եմ վստահեցնել, որ հաջորդ ամիս մենք հանդիպում կունենանք արտաքին գործերի նախարարների մակարդակով»,- ասել է նա:
«Դա հավաստում է, որ մենք շարունակելու ենք երկխոսությունը և պրակտիկ համագործակցությունը՝ մինչև Չիկագոն և Չիկագոյից հետո, քանի որ մեր հարաբերությունները Ռուսաստանի հետ մեկ օրվա կամ մեկ հանդիպման հարց չէ, այլ երկարատև գործընթաց է»,- ասել է Ռասմուսենը։
Հյուսիսատլանտյան դաշինքի պետությունների ղեկավարների և վարչապետների գագաթնաժողովը կկայանա Չիկագոյում՝ մայիսի վերջին: Այդ հանդիպման ժամանակ առանցքային հարցերից մեկը կլինի հակահրթիռային պաշտպանության խնդիրը:
