Հայաստանում եզդիների համար առաջին խնդիրն այժմ կրթական ցածր մակարդակն է: Ինչպես մեր հետ զրույցում նշեց «Եզդիների ազգային կոմիտե» ՀԿ-ի նախագահ Թեմուր Սադախյանը, եզդի երեխաները շատ կարճ ընթացք են դպրոց հաճախում, տարվա ավելի մեծ հատվածը սարերում են անցկացնում, իսկ ստացած կրթությունը ամենաշատը մինչև 15 տարեկանն է: «Հաճախում են հիմնականում հայկական դպրոցներ, քանի որ եզդիական դպրոցները կան միայն Արագածոտնի մարզի 11 եզդիաբնակ գյուղերում, իսկ այդ դպրոցները չունեն ուսուցիչներ ու դասագրքեր»¸- ասում է ՀԿ նախագահը և հավելում, որ քիչ են նաև բուհերում սովորող եզդիները, առավել ևս բացառիկ դեպք է ավարտած եզդի աղջիկ գտնելը: Սակայն վերջին շրջանում ՀՀ ամենամեծ ազգային փոքրամասնության երիտասարդ տղաների մոտ նկատվում է լուրջ վերաբերմունք դեպի ուսումը, նրանցից շատերը սովորում են Հայաստանի տարբեր բուհերում, սակայն աղջիկներին դեռ փակ են պահում: Ինչ վերաբերում է եզդիների մշակութային խնդիրներին, դրանք ինչպես մյուս ազգային փոքրամասնություների դեպքում, նույնն են` անբավարար պայմաններ և անհարժեշտ ֆինանսների բացակայություն, սա սակայն եզդիների դեպքում փոքր-ինչ մեղմ է արտահայտված, որովհետև իրենք հիմնականում իրենց մեջ են պահպանում իրենց մշակույթը: