Հսկիչ դրամարկղային կտրոնը սպառողի հետդարձի ճանապարհն է: Հայաստանի սպառողների ազգային ասոցիացիան չի կարող օգնել իրեն դիմած այն սպառողներին, ովքեր բողոքում են գնված ապրանքի որակի կամ առաջացած այլ խնդրի առնչությամբ, սակայն չունեն հսկիչ դրամարկղային կտրոն: Իսկ այդպիսի բողոքներ հաճախ են լինում:
Գնում ես, օրինակ, ինչ-որ հագուստ և խուսափելով վաճառողի անբարյացկամ վերաբերմունքից` փորձում ես «չչարաշահել» նրա համբերությունը և արագ ընտրություն ես անում, երբեմն նույնիսկ առանց վստահ լինելու ընտրությանդ հարցում: Հասնում ես տուն, հագնում, և հանկարծ հասկանում, որ փոքր է, մեծ է, կամ պարզապես սրտովդ չէ: Այս դեպքում պարզապես կարելի է վերադարձնել ապրանքը¸ սակայն սա ոչ հայաստանյան խանութներում¸ որովհետև մերոնք արդեն հասցրել են իրենք իրենց համար օրենք հնարել¸ թե գնված ապրանքը ետ չի ընդունվում: Եվ սա վերաբերում է բավական մեծ թվով երևանյան խանութների¸ որտեղ անպայման պատերից մեկին փակցված է հետևյալ գրությունը «Գնված ապրանքը ետ չի ընդուվում և չի փոխանակվում»: Այս դեպքում հայ սպառողները տուժում են մեր երկրի օրենքներին անտեղյակ լինելու պատճառով, որովհետև «Սպառողների իրավունքների պաշտպանության մասին» օրենքի 16-րդ հոդվածը հստակ սահմանում է, որ սպառողը, որին վաճառվել է ոչ պատշաճ որակի ապրանք, «իրավունք ունի իր ընտրությամբ պահանջել ապրանքի թերությունների անհատույց վերացում կամ սպառողի կողմից դրանց վերացման ծախսերի հատուցում, գնման գնի համաչափ իջեցում, նմանօրինակ նմուշի ( մոդելի, ապրանքատեսակի) ապրանքով փոխարինում` գնման գնի համապատասխան վերահաշվարկով, առուվաճառքի պայմանագրի լուծում»:
Օրենքը կա¸ սակայն ինչպես շատ այլ օրենքներ¸ սա էլ չի գործում, որովհետև մեր խանութների տերերը, ինչպես նշեց նաև Աբովյան փողոցում գործող խանութներից մեկի աշխատողը, որդեգրել են մի կարգախոս` «Հայաստանում օրենքը ստեղծված է խախտելու համար»: Իրենք` խանութների վաճառողներն ու մենեջերները, բացատրում են, որ դա արել են ավելորդ գլխացավանքի մեջ չընկնելու համար, որովհետև կան մարդիկ, ովքեր 10 օր հետո որոշում են, որ գույնի կամ ձևի սխալ ընտրություն են արել ու որոշում են վերադարձնել գնածը:
Այնպես որ, հարգելի սպառող, անորակ, անգամ անհարմար ապրանքը կարելի է վերադարձնել` ստանալով նորը կամ վճարված գումարը: Սպառողն իրավունք ունի վերադարձնել ոչ պատշաճ որակի ոչ պարենային ապրանքը 14 օրվա ընթացքում` չհաշված գնման օրը, եթե վաճառողն ավելի երկար ժամկետ չի սահմանել: Պետք չէ ամաչել կամ անհարմար զգալ վերադարձնելու հին կամ անորակ ապրանքը, եթե այն նույնիսկ 150-200 դրամի սահմաններում է: Պարզապես նախապես պահանջեք գնումը հաստատող կտրոնը: