Դիլիջանում հրդեհները կազմակերպված են

Ըստ երևույթին, Դիլիջանի անտառների հրդեհումները միտումնավոր բնույթ են կրում: Վերջին մեկ տարվա ընթացքում պարբերաբար ահազանգեր են ստացվում Դիլիջանի անտառներում մեծածավալ հրդեհների մասին:
Չնայած որ պատասխանատու մարմինները ամեն կերպ հերքում են տեղեկություններն անտառին վնաս հասցրած հրդեհների մասին, տեղի բնակիչները պնդում են, որ իրավիճակը բավականին վտանգավոր է: Դիլիջանցիների վկայությամբ գրեթե ամեն օր անտառներն այրվում են:
«Նոյեմբերի 28-ին անտառները այրվում էին Հաղարծինի ուղղությամբ, դեկտեմբերին 29-ին հրդեհը քիչ էր մնում հասներ սոճու անտառին: Այս տարի չափազանց շատ են «պատահական» հրդեհները»,- «Առաջին լրատվականի» հետ զրույցում նշեց դիլիջանցի Գարեգին Մնացականյանը: Ի դեպ, դեռ 2010 դեկտեմբերի 29-ին Դիլիջանում բռնկված հրդեհի ժամանակ հրդեհների մասին լուրը տարածել էր Դիլիջանի Օրհուս կենտրոնը, որի համակարգող Արարատ Ալիխանյանն իր տողերում մտավախություն էր հայտնել հրդեհների շարունակականության վերաբերյալ` նշելով, որ բազմաթիվ դեպքերում դիտավորյալ են հրդեհում: Սակայն Օրհուս կենտրոնի համակարգողի հետ «Առաջին լրատվականի» զրույցում պարզ դարձավ, որ չգիտես ինչու Ալիխանյանն այժմ բոլորովին մոռացել է իր արած արտահայտությունը, ըստ երեւույթին, փոշմանել է: Հիմա արդեն նրա կարծիքով, ամբողջ 2010-ի ընթացքում արձանագրված հրդեհումների շուրջ 70 դեպքերը հնարավոր է պատահական ծխախոտ ընկնելու պատճառ լինեն: Իսկ ինչ վերաբերում է տեղացիներին, նրանք վստահ են, որ տարվա այս եղանակին մի քիչ անմիտ կլինի մտածել ինչ-որ ծխախոտից բռնկված հրդեհի մասին, դիլիջանցիները վստահ են, որ հրդեհների միջոցով փորձ է արվում կորցնել ծառահատումների դեպքերը: Ի դեպ, վերջերս նաև Լոռվա մարզի դատախազն էր այցելել այրվող Լոռու անտառներ և քննարկել միտումնավոր կերպով ծառահատումների քողարկման նպատակով հրդեհումների վարկածը: