ՄԱԿ-ի Անվտանգության խորհուրդն այսօր հայտարարություն է ընդունել, որում իր աջակցությունն է հայտնում Սիրիայի հարցով ՄԱԿ-ի և Արաբական պետությունների լիգայի հատուկ բանագնաց Քոֆի Անանի առաքելությանը:
Ինչպես հաղորդում է «Ազատություն» ռադիոկայանի ռուսական ծառայությունը, փաստաթղթում խոսվում է Սիրիայի նախագահ Բաշար Ալ-Ասադի վարչակարգի դեմ նոր պատժամիջոցների հնարավորության մասին, եթե նա որոշի չկատարել Անանի առաջարկած ծրագիրը: Դրանով նախատեսվում է դադարեցնել կրակը, քաղաքական երկխոսություն սկսել իշխանությունների և ընդդիմության միջև և թույլ տալ մարդասիրական կազմակերպություններին մուտք գործել երկիր:
ՄԱԿ-ի ԱԽ հայտարարությունը իրավական պարտադիր բնույթ չունի:
Ինչպես տեղեկացրել էինք, այսօր ՄԱԿ-ի գլխավոր քարտուղար Պան Գի Մունը, ելույթ ունենալով Ջակարտայում, Սիրիայում առաջացած ճգնաժամն անվանել է «ծայրահեղ վտանգավոր», որն արդեն «սկսել է բացասաբար անդրադառնալ ամբողջ աշխարհի վրա»:
Սիրիացի ակտիվիստների հաղորդմամբ՝ կառավարական զորքերը շարունակում են ծանր հրազենով ռմբակոծել Դամասկոսի արվարձանները:
ՄԱԿ-ի տվյալներով՝ Սիրիայում մեկ տարի տևած հակամարտության հետևանքով զոհվել է ավելի քան 8000 մարդ:
