Երեկ համացանցում տարածվել էր 2011թ. նոյեմբերի 14-ին Սյունիքի մարզպետ Սուրիկ Խաչատրյանի և գործարար Սիլվա Համբարձումյանի միջև «Արմենիա-Մարիոթ» հյուրանոցում տեղի ունեցած միջադեպի տեսագրությունը: Տեսագրությունը մի շարք պատճառներով մինչ այդ չէր հրապարակվել, թեև եղել էին խնդրանքներ գործարար կնոջ կողմից:
«Առաջին լրատվական»-ի հետ զրույցում իրավաբան Արմեն Խաչատրյանը երեկ համացանցում տարածված տեսանյութում ակնհայտ հանցակազմ արձանագրեց: Նա նշեց, որ ցանկացած մասնագիտության մարդ կարող է տեսնել, պետք է կույր լինել չհասկանալու համար, թե ինչպես է Սյունիքի մարզպետ Սուրեն Խաչատրյանը մոտենում գործարարին, սկզբից ոտքով, այնուհետև` ձեռքով հարվածում գլխին: Ուստի, այս պարագայում ձևակերպումը, թե ծեծի հատկանիշները նվազ կարևոր և եզակի են, սխալ համարեց: «Օբյեկտիվ չէ նման կերպ պարզաբանել, քանի որ կար դիտավորություն, միջադեպը եղել է հանրային վայրում և եղել է երկու հարված: Նման դեպքերում հիշատակված արարքն իր մեջ պարունակում է ՀՀ քրեական օրենսգրքի 118-րդ հոդվածով նախատեսված հանցագործություն»,- հստակեցրեց իրավաբանը:
Նշենք, որ 118-րդ հոդվածը նախատեսում է ծեծելը կամ այլ բռնի գործողություններ կատարելը, որը չի առաջացրել քրեական օրենսգրքի 117-րդ հոդվածով նախատեսված հետևանքներ: Այս հանցագործությունը պատժվում է տուգանքով` նվազագույն աշխատավարձի առավելագույնը հարյուրապատիկի չափով, կամ կալանքով` առավելագույնը երկու ամիս ժամկետով:
Դեկտեմբերի 12-ին ՀՀ հատուկ քննչական ծառայությունում ավարտվել էր գործարար Սիլվա Համբարձումյանի գրավոր հաղորդման հիման վրա` «Արմենիա-Մարիոթ» հյուրանոցի սրճարանում իր և Սյունիքի մարզպետ Սուրեն Խաչատրյանի միջև 2011թ. նոյեմբերի 14-ին տեղի ունեցած միջադեպի կապակցությամբ ՀՀ քրեական օրենսգրքի 118-րդ հոդվածով (ծեծ) հարուցված քրեական գործի նախաքննությունը: Նախաքննությամբ հիմնավորվել էր, որ տևական ժամանակ Ս. Խաչատրյանի և Ս. Համբարձումյանի միջև ձևավորվել են անբարյացակամ հարաբերություններ: Հյուրանոցում նշված անձանց միջև 2011թ. նոյեմբերի 14-ին ծագած վեճի ընթացքում մարզպետը մեկ անգամ ձեռքով հարվածել է Ս. Համբարձումյանին: ՀՔԾ-ն հիմնավորել էր, որ հիշատակված արարքն իր մեջ չի պարունակում ՀՀ քրեական օրենսգրքի 118-րդ հոդվածով նախատեսված հանցագործության օբյեկտիվ կողմը կազմող գործողություն, այն է` ծեծի հատկանիշներ իր եզակիության և նվազ կարևորության պատճառով, քանի որ իրավունքի տեսությունում «ծեծել» ասելով հասկացվում է ֆիզիկական ցավ պատճառելուն ուղղված բազմաթիվ հարվածներ հասցնելը:
