Մեկ շաբաթ առաջ Արիզոնայում մահացած իննամյա Քրիստինա Գրինի օրգանները փոխպատվաստել են այլ աղջկա: Այս մասին տեղեկացնում է CNN-ը` հղում կատարելով Քրիստինայի հորը:
Հիշեցնենք, որ անցյալ շաբաթ օրը մահափորձ էր իրականացվել Կոնգրեսի ներկայացուցիչների պալատի անդամ Գաբրիել Գիֆորդսի վրա: Նա ծանր վիրավորվել էր, հանցագործը վիրավորել էր նաև 13 մարդու և վեցին սպանել, որոնց թվում է եղել նաև իննամյա Քրիստինան: Քրիստինայի հայրը տեղեկացրել է, որ Քրիստինայի օրգանների մի մասը փոխանցվել է բոստոնցի մի աղջկա:
Պատասխանելով CNN-ի հարցին, թե կցանկանա՞ր տեսնել իր աղջկա օրգանների շնորհիվ փրկված երեխային, Գրինն ասել է. «Ես շատ կցանկանայի ամուր գրկել նրան»:
Քրիստինա Գրինը «արիզոնյան հրաձիգի» ամենափոքր զոհն է եղել: Ճակատագրի չար հեգնանքով Քրիստինան ծնվել էր 2001թ. սեպտեմբերի 11-ին` ամերիկյան պատմության ամենաաղետալի ահաբեկչության օրը:
