ՌԴ ռազմաօդային ուժերը և «Սուխոյ» կոնստրուկտորական բյուրոն շարունակում են կատարելագործել ռուսական արտադրության 5-րդ սերնդի Т-50 ինքնաթիռները, որոնք պետք է փոխարինեն հնացած «ՄիԳ-29»-ին ու «Սու-27»-ին: Եվ դա այն դեպքում, երբ արևմտյան երկրները հրաժարվել են նմանատիպ ինքնաթիռներից:
Փորձագետները նկատում են, որ ավելի ճիշտ կլիներ հետևել արտասահմանցիների փորձին, քանի որ 6-րդ սերնդի յուրացման համար չկան ոչ միջոցներ, ոչ ժամանակ: Կործանիչների ռուսական պարկը չի թարմացվել 1993-ից ի վեր:
«Ամերիկացիները հրաժարվեցին F-22 Raptor-ից, քանի որ ունեն այլ զինատեսակներ ևս, իսկ մենք 1993-2006 թթ. ոչինչ չենք արտադրել, միայն վերանորոգել ենք: Դրա համար մեզ անհրաժեշտ է հիմա փոխել ինքնաթիռների պարկը, և դրա համար իդեալական է Т-50-ը, որը արդեն թռչում է, ու որը պետք է պարզապես կատարելագործել»,- «Իզվեստիա»-ին ասել է ՌԴ ռազմաօդային ուժերում ունեցած աղբյուրը:
F-22-երի պարկը ԱՄՆ-ում կազմում է շուրջ 200 մեքենա, բացի դրանից՝ կործանիչների ավիացիայում ներառված է 700 հատ F-15 ինքնաթիռ և ավելի քան 1200 հատ F-16: Ռուսաստանում կա 1300 կործանիչ, որոնց կեսը տրված է պահպանության: Ընդ որում, դրանց 90 տոկոսից ավելին պատրաստված են դեռ խորհրդային ժամանակներում:
Т-50-ները կունենան նորագույն ավիացիոն հրթիռային համակարգեր, որոնք կստեղծվեն 2014-ին: «Х-35УЭ, Х-38МЭ, Х-58УШКЭ տիպի հրթիռների մշակումը ՌԴ ռազմաօդային ուժերը կավարտի 2012-2013 թթ.: Ներկայումս այդ զենքի ինտենսիվ փորձարկումներ են տեղի ունենում»,- RIA Novosti-ում հայտարարել է «Տակտիկական հրթիռներ» կորպորացիայի գլխավոր տնօրեն Բորիս Օբնոսովը:
Ռուսաստանի ռազմաօդային ուժերի գլխավոր հրամանատար, գեներալ-գնդապետ Ալեքսանդր Զելին հայտարարել է, որ Т-50-ը ռուսական ռազմական ավիացիայում կդառնա իր տեսակի մեջ էլիտար:
Т-50-ի առավելությանը փետրվարի վերջին Սարատովյում կայացած «կլոր սեղանին» անդրադարձել էր նաև Վլադիմիր Պուտինը` հայտարարելով, թե Т-50-ի վրա կատարվող աշխատանքները պետք է բավական արագ ավարտվեն, և որ դրանք գերազանցում են նույնատիպ ամերիկյան կործանիչներին:
