Երևանի Կենտրոն և Նորք-Մարաշ առաջին ատյանի դատարանում այսօր շարունակված՝ ոստիկանության քրեական հետախուզության նախկին պետ Հովհաննես Թամամյանի և ոստիկանության մյուս 2 աշխատակիցների գործով դատավարությանը մեղադրող դատախազ Հարություն Հարությունյանը հրապարակեց մեղադրական ճառը: Դրանով պետական մեղադրողը մասնավորապես միջնորդեց դատարանին Հովհաննես Թամամյանին ազատազրկել 4 տարի ժամկետով, իսկ մյուս երկու ամբաստանյալներին` Արմեն Պողոսյանին և Վահան Խանզադյանին` յուրաքանչյուրին 2 տարի ժամկետով, սակայն ազատազրկումը պայմանականորեն չկիրառել:
Հիշեցնենք, որ նախորդ դատական նիստում երեք ամբաստանյալներն էլ` Արմեն Պողոսյանը, Վահան Խանզադյանը և Հովհաննես Թամամյանը, միջնորդեցին դատարանին դատաքննությունն անցկացնել արագացված կարգով, որի դեպքում արդեն ապացույցների հետազոտման փուլ չի անցկացվում, և ամբաստանյալները զրկվում են փաստական հանգամանքների վերաբերյալ դատարանի որոշումները վերաքննության կարգով բողոքարկելու իրենց իրավունքից: