Թուրքական Taraf թերթի փոխանցմամբ՝ ամերիկյան STRATFOR հետախուզա-վերլուծական կենտրոնի նամակագրության մեջ ուշագրավ տեղեկատվություն կա՝ կապված թուրք-սիրիական հարաբերությունների հետ: Հիշեցնենք, որ WikiLeaks կայքը ներկայումս սկսել է հրապարակել STRATFOR-ի 5.5 միլիոն նամակները, որոնք ստացվել են ցանցահենների իրականացրած գործողությունների արդյունքում:
2011 թվականի նոյեմբերի 15-ին թվագրված նամակում նշված է, որ թուրք-սիրիական համաձայնագրով Թուրքիան իրավունք ունի 15 կիլոմետր խորությամբ բուֆերային գոտի ձևավորել Սիրիայում: Այս մասին նշել է STRATFOR-ի մերձավորարևելյան վերլուծաբան Ռևա Բհալան:
Նա հիշեցրել է, որ 1998 թվականի հոկտեմբերի 20-ին Ադանայում Թուրքիայի ու Սիրիայի միջև կնքվել է բախումներին վերջ դնելու և երկկողմանի թշնամությունը համագործակցության վերածելու մասին համաձայնագիր: Դրանով Սիրիան հրաժարվում էր Հաթայի նկատմամբ տարածքային պահանջներ ներկայացնելուց, ինչպես նաև Սիրիան չպետք է թույլ տար, որ իր տարածքից Քրդստանի աշխատավորական կուսակցության (PKK) զինյալները ներթափանցեին Թուրքիա:
Բացի այդ, Թուրքիան իրավունք էր ստանում PKK-ի զինյալներին հետապնդելիս 5 կիլոմետր խորությամբ ներթափանցել Սիրիայի տարածք: Սակայն մի շարք ինտերնետային կայքեր հայտնում են, որ Սիրիայի տվյալ ժամանակվա նախագահ Հաֆեզ Ասադը թուրքական բանակին թույլ է տվել իր երկրի տարածքում խորանալ մինչև 15 կիլոմետր, սակայն առավել տրամաբանականը 5 կիլոմետրն է:
Հիշեցնենք, որ վերջին ամիսներին թուրքական կողմը շարունակ պնդում է, թե կարող է բուֆերային գոտի ձևավորել Սիրիայում:
